SPECIÂL – L’esempli dai slovens

Denant de situazion a pene presentade, a son dome dôs rispuestis: spietâ che la leç e tiri i sghirets e compagnâ il muart in simitieri, o pûr mobilitâsi par che il guvier talian al cambii direzion. La prime strade e je dome par chei che i plâs vaî il muart, par ducj chei altris, invezit, al è miôr pontâ su la seconde soluzion. No si trate di une imprese impussibile. Bastarès cjapâ di esempli la comunitât slovene.
Inte leç finanziarie prontade dal guvier Berlusconi pal 2009 si leve a taiâ i fonts pe minorance slovene puartantju dai 5,25 milions di euros stanziâts dal guvier Prodi a 4,13 milions. A front di cheste riduzion, la comunitât slovene si à mote in maniere unitarie. A mobilitâsi a son stadis, prin di dut, lis dôs organizazions di riferiment de minorance (SKGZ e SSO). La lôr azion e à vût rivoc a nivel regjonâl (si à fat sintî ancje il president de Zonte Tondo), a nivel statâl (massime in gracie de senatore Blažina) e a nivel internazionâl (cun intervents dal president de Republiche slovene e dal guvier di Lubiane). Risultât? Il guvier talian al à zontât un milion di euros pe minorance slovene dentri dal decret «Milleproroghe».
Cualchidun pensial che se si ves vude une azion convinte e unitarie ancje dome dai parlamentârs furlans e sarts al sarès stât cussì facil taiâ i fonts pe 482? Magari cussì no, o savìn che a ‘nd è di politics di chenti che dal furlan no i free piç o che lu àn fintremai in asse (ma il stes discors al vâl ancje pe Sardegne e par altris realtâts minorizadis). Cundut achel, no varessial di jessi un lôr dovê chel di difindi i interès de lôr tiere? Ce sucedaressial se no si batessin par difindi une altre jentrade pal lôr teritori? O forsit pensino che i investiments pes lenghis minoritariis, par trop scjars che a sedin, no rapresentin une oportunitât in plui?
Altris timps cuant che un deputât furlan, cence pôre e inte sô lenghe, al diseve ai siei coleghis parlamentârs «se ducj nus bandonin, si judarìn bessôi!».
Carli Pup