SPECIÂL – Cjampanis a muart pe 482?

Se si vûl che une leç no vegni metude in vore, la maniere miôr e je chê di lassâle cence bêçs. E al somee jessi propite chest il destin che i tocjarà ae leç statâl 482/99, chê su lis minorancis linguistichis storichis.
Se si pense che, cun cheste leç, si varès vût di garantî l’ûs di dodis lenghis minorizadis inte scuele, intes aministrazions publichis e intal servizi radiotelevisîf, bielzà dal principi si podeve dî che i bêçs a disposizion no jerin avonde. Tant plui se si calcole che, pe plui part des comunitâts in cuestion, si veve di imbastî dai servizis cuasi dal nuie. Cun di fat, tal 2001, il prin an che il stât talian al veve tacât a dâ fûr i bêçs pe 482, la cifre totâl a disposizion e jere di sù par jù 8 milions e 884 mil euros a front di une popolazion interessade di plui o mancul 3 milions di personis.
LA PRIME RIDUZION_ L’an dopo la cifre totâl e jere cressude in gracie de zonte dai fonts pal 2000 che no jerin inmò stâts dâts fûr, e po si veve sestade, tai agns seguitîfs, tra i 9 e i 9,5 milions di euros. Dal 2006 indenant, invezit, si à tacât a viodi une riduzion progressive dai fonts. I 8 milions e 300 mil di chel an, di fat, a jerin deventâts mancul di 6 milions tal 2007 e pôc plui di 4 milions e 600 mil tal 2008. Il tai dai fonts pe 482 al è une des pocjis robis che, a Rome, al somee vê cjatât in cunvigne centri diestre e centri çampe.
STRATEGJIE PLUI PENZE_ La finanziarie pal 2009 parturide dal guvier Berlusconi e à rapresentât un salt indenant ta cheste strategjie. I fonts totâi, di fat, si son sbassâts a pôc plui di 2 milions di euros. Une cifre che, daûr dal belanç di prevision, e sarà taiade inmò di plui chest an che al ven e che, al è ben tignîlu a ments, e va dividude framieç di dutis e dodis lis comunitâts minorizadis cjapadis dentri de 482. Tant par capîsi, pe lenghe furlane, chest an, a rivaran dal stât talian pôc plui di 300 mil euros: une cifre plui basse di chê che il guvier irlandês al à metût par svilupâ une base di dâts informatiche di tiermins legâi o burocratics de lenghe gaeliche.
COROT PES LENGHIS?_Nissune persone di bon sens e pues pensâ di garantî ai citadins i dirits linguistics previodûts de 482 cun cheste cagnere di bêçs. Colpe de crisi economiche? I belançs plurienâi dal stât a fevelin clâr: si trate di une strategjie studiade e inviade bielzà di timp. E, intant che a Rome al è cui che al taie, a nivel locâl al è cui che al fâs lis campagnis cuintri dal furlan (o dal sart, dal ocitan, e v.i.). Par dîle in struc, il 2009 al veve di jessi l’an de fieste pai dîs agns de 482 e, invezit, al riscje di deventâ l’an dal so funerâl.
Carli Pup