SIMPRI BOGNS. Josef Marchet (Vigj Scuete) Lis predicjs dal muini, Udin, 1965

«Al è dibant lâ a cirî Gargagnà su lis mapis dal Friûl: no si cjatilu nancje in chês plui minudis e precisis ch’a doprin i militârs, indulà che a son segnadis fin lis farcadizzis. Gargagnà nol è une ‘entitât geografiche’; al è une ‘entitât morâl’, un fat di custum: al è dut il Friûl cjalât de bande dal ledrôs, di chê bande dulà che une tele ‘e mostre duc’ i siei grops, dutis lis zontis, lis mendis, i difiez, insumis dute la veretât».
Al scomence cussì il preambul di Josef Marchet ae racuelte des predicjis dal muini Vigji Scuete, di Gargagnà Disore, un paisut tant malsestât che nol à nancje un fregul di capelan par so cont e che al scuen contentâsi di chest biât dalmenâr (ven a stâi che al à il dotorât in dalminis) che al vîf di bessôl e che si avode a tignî in ordin la gleseute, a scovâle, a smondeâle, a furnîle. E in plui al cjale, cun voi ferbints, dut ce che al sucêt in paîs. E al ten sù rosari e al mole predicjis a chei cuatri carampans che a vegnin in glesie. A Gargagnà (non che al fâs vignî iniment il Gargantua di Rabelais, un che al saveve doprâ ben, ancje lui, il glotidôr) a son votcent animis, vot ostariis, cuatri buteghis, trê cjaliârs, vot sartorelis, ma al è un paîs di cjochelis, barabis, imbroions, massepassûts, bogns di nuie, zuiadôrs di scaraboç, rincuradôrs di cjichis, frutatis di nauli, feminis piês di liparis e v.i. Dificil cjatâ cualchi olme dal furlan salt, onest e lavoradôr.
Vigji no lis mande a dî a di nissun, ma, in fin dai fats, nol è nancje tant simpatic. Nol à ducj i tuarts Florean Baduscli cuant che i dîs (p. 161) che al è une lengate di madrac e che lu invide a impaçâsi dai siei afârs. Ni Gjino de Penze cuant che lu acuse di pretindi di fâ sentenzie in dutis lis robis e di insegnâ il vivi dal mont a dute la vile. E in efiets, chest muini le à sù cun ducj, al palese un misoneisim arogant, al trate mâl lis feminis (sturnelatis di feminis, sdavassone buine di nuie…), al à simpri reson lui. Al ven il scrupul che Marchet, in realtât, al vueli butâ la critiche no dome sui difiets de int, ma ancje su la pofardie dal muini.
Ma, al di là des interpretazions che si puedin dâ, il presi plui grant di chest libri al è inte lenghe doprade. Un furlan vivarôs, che al sclopete ogni moment, plen di vite e novitâts in ogni pagjine. A scomençâ cui nons (Toni Sclese, Vigji Brustul, Checo Strucje, Checo Brucje, Toni Mescule, Meni Pirule), lant indevant cun metaforis fulminantis e similitudins sflandorosis, e par finî cui dominepatris, cui nunchetinore, cui patarnostars, cui diprafundis, cui gloriapatris, cu la diesile.
LAURIN ZUAN NARDIN