Fieste grande sabide ai 17 di Jugn tal Museu di Zui pal fat che a son tornadis a cjase cinc statuis de Plêf di S. Pieri in Cjargne. «Al jere il 1981 – al conte il sindic – cuant che nus àn dit che te gnot (tra i 14 e i 15 di Novembar) a erin jentrâts i laris inte Plêf di S. Pieri. In sede di sorelûc, a mancjavin 15 statuis dal altâr. Jo o jeri vicesindic, e o ai subit pensât che nô aministradôrs, impegnâts te ricostruzion post taramot, salacor o vevin trascurât il nestri patrimoni artistic. Tal mês di Lui dal an passât, mi è rivade la biele notizie: cinc des 15 statuis a son stadis cjatadis in gracie dal lavôr dal Comant dai Carabinîrs di tutele dal patrimoni culturâl. Cuant che lis ai viodudis, dopo 36 agns, o ai provade une emozion fuarte. Chê altre setemane, lis ai cjapadis tal braç une ae volte e o ai vût une biele sensazion: finalmentri a son tornadis a cjase! Vuê o soi content di jessi il sindic di Zui. Ducj nô si sin impegnâts par chest e par che lis gjenerazions di doman a puedin savê de grandece di Zui e che a proviodin ae conservazion di secui di storie.»
Une zornade di no dismenteâ ancje pal prevost Giordano Cracina: «al è cun profonde comozion che, a non des personis e de popolazion de Cjargne, o cjapi la peraule par rindi graciis al Signôr e a ducj chei che a àn colaborât a recuperâ e tornâ a S. Pieri chestis sculturis.»
Lis statuis a son sistemadis in maniere provisorie tal museu civic archeologjic Iulium Carnicum di Zui e cui che al vûl al podarà lâ a viodilis intai oraris di viertidure (tel. 0433/92562), e aprofitâ di amirâ ancje i tesaurs de Plêf di S. Pieri e no dome.
Dopo a vignaran puartadis intal museu Janua coeli de Plêf che al è in fase di realizazion intune struture comunâl te frazion di Formeâs, furnide di ducj i dispositîfs di sigurece. «E achì no pues no presentâ – al va indenant pre Giordano – il grup di zovins dal comitât che, coordenât dal dotôr Ganzer cul supuart di bonsignôr Piussi, si sta dant da fâ par une sensibilizazion e un coinvolziment dai zovins e des comunitâts de Cjargne. O vûl sperâ che cu la sinergjie fra ents publics e privâts e ancje cu la conservazion e tutele di chest teritori si puedi ufrî al nestri Friûl une ricjece culturâl, spirituâl e sociâl che e fasi dai 3 pôi – Aquilee, Cividât e Zui – no dome i riferiments impuartants de storie passade ma ancje i fârs di sperance pal doman.»
Lis cinc sculturis, fatis tal 1481 di Domeni di Tumieç, a rapresentin i Sants Andree, Pauli, Jacum Maiôr, Mateu e Tomâs. «A àn lis dimensions di un frutut – al à dit il vescul emerit Brollo -, cuissà che chest nol sedi un segnâl che Diu al deti ae Cjargne di vê ancjemò frutins…»
✒ Marta Vezzi
