DI SCJAS IN SCJAS: I TARAMOTS INTE STORIE FURLANE. I Orcolats dal Nûfcent

Secul curt. Cussì lu àn clamât chei che si ocupin di Storie. Parcè che nol dure cent agns, ma ducj i avigniments plui impuartants a son striçâts jenfri confins temporâi une vore strents. Epûr al somee che al seti stât il plui trist e crudêl di ducj, cun dôs vueris mondiâls e il grant cambiament dal 1989, che al dissegne tal ribalton gjeopolitic di Berlin un confin che al cambie la muse de Europe.
La storiografie taliane, masse concentrade su dutis chês altris regjons fûr che il Friûl, nus impon une memorie curte. Ancje pal taramot. Cussì si visisi dal grant disastri di Reggio Calabria e di Messina, compagnât di un maremot, ai 28 di Dicembar dal 1908. Ma cui nus contie di chel che tal Lui dal stes an al à sdrondenât lis Alps de Cjargne, dismovint une popolazion spauride e spaventade ae dôs di gnot dai 7 di chel mês? L’epicentri a Mueç. Di une rabie che e supere i 5,5 grâts de scjale Richter, ma une vore distrutîf, rivant al novesim grât de Mercalli. Tant che i dams a jerin stâts cuantificâts par une puartade di plui di 50.000 liris di chel timp: un sproposit. I oms, massime de valade de Aupe, a son stâts obleâts a tornâ a cjase de migrazion vie pe Europe par judâ lis lôr fameis, e lis conseguencis a son stadis une vore pesantis pal redit familiâr, dal moment che i contrats di lavôr a son stâts ducj revocâts, cu la conseguence di une miserie spaventose. Tant che adiriture il Pape, Piu X, al fasarà vê bêçs pe ricostruzion de glesie di Dordole. La glesie! La int invezit, sistemade in barachis di len ordenadis dal sindic di Mueç, e scugnarà rangjâsi di bessole. Come simpri. Altris savoltaments a son stâts ai 12 di Mai e ai 12 di Dicembar dal 1924, a Dimpeç, e po dopo al prin di Zenâr dal 1926, simpri in Cjargne.
Annus horribilis, il 1928: Cjavaç, Verzegnis, Tumieç e dute la valade dal Arzin, dopo di un Fevrâr tant frêt che si viodin i lôfs a cori pai paîs di mont, a tremin. Ma no pe glace. Plui di cent sfolâts des borgadis distrutis di Galants, di Marins e di Pocis a son rivâts jù a Anduins e a Cjasiât: vecjos, feminis e fruts. I oms no ju convinç nissun a abandonâ i paîs: a restin a lavorâ, dì e gnot, a dâ di mangjâ aes bestiis, a cirî di netâ rudinaçs e a tacâ daurman a tirâ sù ce che al jere vignût jù. Dute la valade e dimostre la sô solidarietât spontanie e di fuarte umanitât. Inte sô relazion al Prefet, che al stanzie 57.594 liris, il sindic Giobatta Gerometta di Vît al conte che al organize cjase par cjase une racuelte di lat, di cjar e di vin. Che a chei puarets no ur mancji il confuart de solidarietât dai lôr fradis furlans, plui impuartante che no i bêçs. A Pasche no mancjarà la fuiace par ogni famee di taramotât. Ma no je finide: il Nadâl dal 1931 si festeze cuntun scjas mighe di poc. Ai 18 di Otubar dal 1936, la scjale Mercalli e segne i 9 grâts inte zone di Sacîl, cun muarts e devastazions che a àn cambiât il profîl dal paisaç urban, in particolâr a Cjanive, Polcenic e Sant Florean.
Ma al sarà ai 26 di Avrîl dal 1959 il disastri plui grant prime di chel dai 6 di Mai dal 1976. A Tumieç a son lis dôs e 46 dal dopodimisdì. La Mercalli e rive al grât 9, la Richter e passe il cuint, par une aree di coinvolziment sismic di plui che 12.000 chilometris cuadrâts. No forin vitimis, une sole persone e je restade feride a Zui ma popolazion dai paîs colpîts, pe pôre di replichis, e passe lis gnots dopo ae scjassade fûr cjase. Al discomut causât dal abandon des abitazions si à zonte chel de ploie, cetant bondante ae fin di Avrîl, agravant i dams dai edificis.
Clarementri, al reste il plui documentât e ancje studiât. Cuntune relazion une vore impuartante, siglade tal 1965 di doi studis impuartants, P. Feliziani, L. Marcelli, là che no dome si faseve il pont de criticitât sismiche dal Friûl inte storie, ma ancje si pontave la atenzion sul fat che 20 secui di taramots a oblearessin a une grande atenzion inte culture de prevenzion. 1965! Undis agns dopo… ❚
✒ Agnul Floramo