SIMPRI BOGNS. Gabriele Zanello, Giovanni Battista Gallerio. Gli autografi delle poesie e delle prediche friulane, Udin, 2005

“Vergine Mari del Fì uestri fie, / umil e grande plui che creature” / spose sante di Dio, colombe pure, / biele Marie, // il ventisel d’avril al à vistudis / del so biell verd lis nestris culinutis, / e a zeis sun lor lis freschis sos rosutis / al à spandudis. / E il rosignul tal miò boscut al torne, / e cul so chiant dolcissin mi console, / e l’odulute fin tal nul e’ svole / e legre ‘ e zorne.
E scomence cussì la prime des poesiis popolârs dal plevan di Vendoi, Il mês de Madone.
Zuan Batiste Galerio (1812-1881) al fo un om di culture e di poesie in plui che predi, plevan di Vendoi par plui di cuarante agns.
Gabriel Zanello i dediche chest libri (scuasi cuatricent pagjinis), rielaborazion di une tesi di lauree, che al pues jessi considerât une edizion critiche de opare che Galerio al à lassât.
La part descritive (la biografie, lis ocasions pe scriture, la fortune, lis notis su la lenghe, su la grafie, la morfologjie, il lessic e v.i.), vâl a dî dut ce che al à scrit il curadôr, e je dute par talian; par furlan a son i tescj dal autôr.
A son poesiis religjosis che a pandin la buine dutrine o ben che a contin fats des Scrituris: par esempli, lis undis zornadis che a ilustrin la vite de Madone. Ma a son ancje prosis, discors su articui di fede dal Credo (confront cul protestantisim, comunion dai sants) e predicjis.
Al è di marcâ che lis predicjis dai predis, a cjaval jentri il Sietcent e il Votcent, a forin la plui impuartante produzion scrite par furlan e che dome une part minime e je cognossude, studiade e publicade.
Si che duncje al è meritori chest studi di Zanello e meritorie Glesie Furlane che lu à publicât. Ancje par vie che nus dîs che, in chei timps (che no son propit cussì lontans), la int furlane e preave par furlan.
Magari al jere un furlan che al talianotave ben e no mâl, come chel di Galerio, ma furlan al jere. E al leave la necessitât di doprâ la lenghe dal popul cu la culture grande e alte: impussibil no cognossi intal incipit che o vin citât culì parsore, un rivoc di Dante. ❚
✒ Laurin Zuan Nardin