Pre Zaneto, il predi poete. E je stade a pene publicade la sô prime biografie curade di Serena Fogolini | Une cerce | Cui che al jere Pre Zaneto

Don Giovanni Schiff (1872-1947), pre Zaneto, poete dal popul al è il prin studi organic dedicât a cheste impuartante personalitât dal Friûl di mieç. Une ricercje che e à puartât ae lûs tancj particolârs su la sô opare poetiche, sul so impegn sociâl e su la sô intense ativitât parochiâl. Un esempli di tignî cont, Pre Zaneto, contât intun libri di vê e di lei, realizât di Serena Fogolini, laureade magjistrâl in lenghis pe comunicazion internazionâl inte Universitât dai Studis dal Friûl.
Tra lis tantis curiositâts di cognossi sul so cont, pre Zaneto al è stât autôr di passe cent mil viers e in tai agns Trente, a cause des leçs fassistis che a vietavin di usâ i dialets, si jere inventât un mût cetant origjinâl par scjampâ ae censure, poetant intun lengaç dal dut inventât, tra il talian e il furlan, rivant adore di imbroiâ i legjislatôrs vistîts di neri par puartâ indenant la sô cause nobile.
Figure poliedriche e cetant vivarose, il so esempli si slargje ancje inte difese dai ultins, dai plui debii e des associazions e des iniziativis di agregazion intes comunitâts. Ancje lis sôs predicjis par furlan a otignivin preseaments tra i fedêi propit pal stîl, i contignûts e la lenghe doprade.
Cence dubi, chest prin ritrat curât di pre Zaneto, al presente un personaç pardabon carismatic, impegnât in plui che inte divulgazion de peraule di Diu, inte valorizazion de sô tiere, dal so popul e de sô lenghe. Une azion che e viôt protagonist un predi, une altre testemoneance dal impegn impuartant de Glesie furlane inte difese de identitât locâl. ❚
___________________________________
Une cerce
Us proponìn la prime pagjine dal libri Poesiis furlanis di Sior Zaneto, dulà che l’autôr si presente e al spieghe diviersis robis su la sô poetiche e sul so spirt di furlan.
Ciarissins letôrs,
chi o ves di viodi niemancul che vinç poesiis fatis da me stess in chest timp di dominazion todesçhe e fin ai dis nestris. Il contenut di chesç sones, idilis e odis e an un suc di morâl, di conpassion e ançie di legrie.
Dopo la ploie di solit al spunte il soreli, come al diss il proverbi. E son nininis, çiars ricuars de vite trascurade, mò cà, mò la, simpri cul scopo di fa dal ben.
Del rest a son poesiis facilis acapissi par duç, e an il sfont popolar e sentimental. Il viers al è dantesc, e ançie imite sul viers di Leopardi, di Pindar grec e del nestri grand’ maestri Pieri Zorut.
Quindi io us auguri une buine leture, us auguri insomi felicitât e grande tendenze viers lis mes poesiis lirichis; o podares lei sot la nape, durant lis oris lungis d’invier!
Buine leture!
Feagne il 3 Novembar 1945
__________________________________
Cui che al jere Pre Zaneto
Pre Zaneto, il so vêr non al è Giovanni Schiff, al è nassût a Porpêt ai 17 di Zenâr dal 1872 e al è muart a Percût ai 4 di Lui dal 1947. Plevan, poete popolâr, scritôr e gjornalist, al à esercitât il so ministeri a Vuirc, Malisane e Percût. Al à scrit par plui di vincjecinc agns pal setemanâl La Vita Cattolica, publicant lis sôs poesiis e i siei articui, cetant seguîts. Come che al à fat notâ Domenico Zannier, lis sôs poesiis no son ancjemò jentradis a fâ part des antologjiis, ancje se insiemi a Zorut, come che al à comentât Giorgio Faggin, Zaneto al è «la plui grande risorse pe cognossince de lenghe furlane plui gjenuine».
Il so libri dal titul «Poesiis di Zaneto», publicât intal 1945, a vuere a pene finide, al è stât editât diviersis voltis e cumò, in gracie dal lavôr de ricercjadore Serena Fogolini,  la sô figure e personalitât, une des plui rilevantis a cjaval tra Vot e Nûfcent in Friûl, e ven a jessi riscuvierte come che e merete.
«Pre Zaneto, poete dal popul», realizât cul contribût de Provincie di Udin, dal Comun di Porpêt, de La Vita Cattolica, de Societât Filologjiche Furlane e dal Cirf, si presente tant che un volum monografic, une biografie dulà che Pre Zaneto al ven ricuardât tant che un predi popolâr che al à prodot lirichis in marilenghe, componiments ma ancje cronichis cetant letis e amadis. Il so, cemût che a disin autorevui esperts, al jere un furlan sclet, popolâr, diret, cussì di podê fâ “rivâ” i siei messaçs a ducj. ❚
✒ Alessio Screm