SIMPRI BOGNS. Christian Romanini, “Sul troi di Aquilee”, Pasian di Prât, 2015

«Chest diari al scomence cun cualchi an di ritart rispiet a cuant che o varès vût di partî sul Iter Aquileiense pe prime volte. Al jere il 2011: di in chê volte a vuê nol è plui gno pari, ma al è gno fi: Gian Carlo e Lorenzo si son passâts il testemoni te mê vite e chest viaç sul Troi di Aquilee al è ancje une maniere di fâ chel tocut di strade insiemi, che il destin no nus à permetût di fâlu prime».
E za cun chestis riis o vin capît di ce che si trate. Christian al à fate cheste lungje cjaminade di Grau fintremai a Madone di Mont, passant par Dael e Cormons e puartant cun se il ricuart dal pari mancjât di pôc e l’afiet dal fi di pôc vignût in chest mont.
Scuasi setantedoi chilometris, in cuatri tapis, che l’autôr nus es mostre suntune piçule mape.
Un pelegrin, in sumis, un pelegrin tant che chei di une volte che a cirivin i lûcs de fede, basilichis, glesiis e gleseutis (Sante Eufemie, Barbane, Sant Quarin…), ma in chel stes timp a profitavin par cjalâ la nature, la campagne, i nemâi, il cîl e la tiere, dut ce che al viveve ator di lôr.
Christian al zonte ancje la Storie, che lui al lei in clâf autonomiste par chel che al inten il Friûl e che i spieghe cun semplicitât a so fi, par mostrâi il troi che al varà di fâ ancje lui, cuant che al sarà grant (i sants Ermacure e Fortunât, il schisme dai trê cjapitui, la grande vuere e l’imperadôr Franz Joseph, Marie Bergamas, la emigrazion, la Ara Pacis di Migjee e v.i.).
E simpri presints a son i vons, clamâts cui lôr nons, scuasi par fâi capî al frut, simpri, di dulà che al ven, che lui al è il risultât di chês vitis che cumò no son plui.
Ma si pues dî che chest librut al è ancje une opare a plui mans. Par vie che a intervegnin altris autôrs a contâi alc a Laurinçut: pre Tonin Cjapelâr, Pauli Petiziol, Enos Costantini, Gabriêl Pellizzari e pre Roman Michelot.
E po, no si pues no segnalâ lis fotografiis che a ilustrin i paisaçs che il pelegrin al travierse cjaminant: dutis bielis, ma la plui biele di dutis e je chê di p. 106.
Lait a viodile. ❚
✒ Laurin Zuan Nardin