EDITORIÂL – Su la cuarde de imigrazion

Fevelâ di imigrazion al è tant che cjaminâ suntune cuarde di ecuilibrist: al bisugne distrigâsi tra memorie dal  passât e idee di futûr, tra principis assolûts e un sintiment realistic. Provìn a passâle fûr, cheste cuarde.
*** I buonisti di profession – in gjenar no son a stâ li che e je alte densitât di imigrazion – a ripetin: o sin stâts ancje nô emigrants. Vere, ma in timps e mûts diviers, come che i furlans a san ben. A jerin migrazions temporaniis lant li che al jere lavôr, par tornâ indaûr cui sparagns par fâ sù une cjase. O pûr migrazions par simpri, di Toronto ae Argjentine, costruint comunitâts che a àn tignudis vivis lis lidrîs, ma no àn ostacolade une integrazion di sucès, fate di rispiet vuadagnât e ufiert aes gnovis patriis.
*** Vuê nol è cussì: no emigrin muredôrs o contadins, cjarpentîrs o minadôrs. Plui dispès a son zovins cuntun telefonut e cence mistîr, plui dificii di integrâ intun paîs, il nestri, che nol sarà mai plui un paîs di grandis fabrichis, di lavoranzie no cualificade. Nus coventino i vendidôrs ambulants in splaze? Nus coventino chei devant dai supermarcjâts a domandâ cualchi carantan? La integrazion e je rivade in pôcs setôrs, e dispès sot dal segn dal sfrutament: l’arlevament inte planure padane, lis racueltis stagjonâls al Sud, la assistence des badantis ai anzians. Il passât des nestris emigrazions al jere une altre robe.
*** E il futûr? La Italie, e ancje il Friûl, a son a cressite demografiche sot zero. Al è normâl: nissune femine vuê e sacrificarès lis sôs oportunitâts par fâ cinc fîs, nissune cubie si venture a fâ fîs che nol podarès fâ studiâ. E fâ fîs, cuant che il lavôr  al è inciert, no je une sielte a cûr lizêr. Vino bisugne di sanc gnûf, di cualchidun che al jempli i vueits di un paîs simpri plui anzian?  I buonisti a sostegnin che i imigrâts a contribuissin a paiâ lis pensions a cui che al è rivât a scjampâ de “manarie” de Fornero. Nol è cussì imediât: e lis spesis pai centris di acet, pe istruzion, pe assistence sanitarie dai gnûfs rivâts?
*** Cui che al guvierne il futûr demografic dal Paîs al varès di fissâ un numar di imigrâts che o podìn pardabon prometiur lavôr, integrazion, dignitât di gnûfs citadins. E nissun nol dîs i numars: o patìn une emergjence continue.
*** Cui che al predicje al à il dovê di riclamâsi ai principis. No si pues no acetâ cui che al scjampe di une vuere. Ma no ducj a scjampin di vueris: afghans e pakistans a rivin cirint un futûr miôr – che nol è un crimin – ma no scjampin di vueris (e al sarès strani che a scjampin lassant indaûr feminis e fruts…). A son migrazions economichis, e a àn di rispietâ regulis, tant che i nestris paisans a àn fat intes Americhis o in Australie. E ancje scjampâ di une vuere nol vûl dî trasferîsi par simpri: i Balcans a son stâts passâts di vueris, ma no si son butadis tal forest par simpri interiis popolazions. A van judâts intai cjamps di rifugjâts, judâts intal cirî la pâs e inte ricostruzion, ospitâts il timp che al covente a otignî il cidinôr des armis.
*** Il pape Francesc al à tirât sù une dozene di dispatriâts di une isule greche. Sono stâts ospitâts in Vatican? L’acet nol è un sintiment facilon: al à di jessi acompagnât di dignitât, dome la compassion no baste. E nancje la ipocrisie dal recupar dai migrants in mâr: divuardi a no salvâ cui che al pues jessi salvât. Ma alore tant vâl lâju a cjapâ cui traghets, fâ puints aeris e sdrumâ l’afâr dai scafiscj. Ma soredut, la imigrazion e larès guviernade ae origjin: concession di vistâts, cors di preparazion professionâl intai lôr paîs, intant che si fissin cuotis e limits par ogni an e par ogni paîs. Tignî lis puartis viertis al jemple dome che lis ilusions di chei che a partissin – che no son mai i plui puars e sfortunâts – e i belançs di tancj che a vivin sul afâr dal acet. ❚
✒ Toni Capuozzo