FRIÛL EUROPE. A cui zovial l’acuardi tra Union europeane e Ream Unît?

Al è dut un altri mont, e je dute une altre Europe. Trentedoi agns indaûr, ai 14 di Fevrâr dal 1984, il Parlament european al faseve bon, cuntune risoluzion votade di une maiorance fuarte dai eurodeputâts, chel che al ven clamât Progjet Spinelli, ven a dî un Progjet di Tratât costituzionâl che al veve chê di istituî une Union europeane fuarte e democratiche. Ai 18 e ai 19 di Fevrâr passâts, a Bruxelles, il vertiç des delegazions dai guviers dai stâts de Union europeane di vuê al è stât une barufe continue, sui bêçs e soredut su imigrâts, dispatriâts e confins: al à cjatât dome un acuardi, che al conferme – e che salacor al rinfuartìs – ducj i limits e dutis lis contradizions di une Europe, che e je une vore divierse di chê pensade a Strasburc de bande di chei dal Club dal Crocodîl.
La sentade dal Consei European si à sierade, ma lis cuistions a restin dutis viertis, a tacâ des limitazions pe libertât di circolazion des personis. Lis previsions dai acuardis di Schengen a son stadis metudis te glacere za cualchi timp indaûr e a vegnin puartâts indenant gnûfs controi di polizie tes frontieris internis de Union.
Il guvier austriac al à decidût di meti une cuote fisse di dispatriâts che si pues dâur acet ogni dì tal so teritori, cun chê di rispuindi aes esigjencis de politiche interne e cul intindiment di proponi tra i Vincjevot une distribuzion des personis che a domandin asîl in proporzion cul numar dai citadins di ogni stât. La iniziative di Viene no ur plâs ni ae Comission, che le calcole ilegjitime, e nancje a chei altris stâts, che massime a nord e a est no vuelin sintî fevelâ di ripartizions e di proporzions. Cussì ognidun al va indenant a sierâ i confins, cu la Grecie che si sint sbandonade, sei te sô crisi socioeconomiche sei tant che lûc di rivade de plui part di chei che a scjampin de vuere e de fam. Par intant il guvier talian – ancje chel, compagn di chei altris, preocupât soredut dal consens e de propagande a nivel statâl – al à provât a meti in discussion i finaziaments pai stâts de Europe orientâl, che a mostrin di tignî ae Union dome cuant che ur conven, ma al à cjatât  dome un scuintri diplomatic cu la Ongjarie e si à inacuart di cetant che a pesin il vôt ae unanimitât e il metodi intergovernatîf.
In spiete di viodi pardabon chê rispueste unitarie e europeane ae cuistion dai migrants, che e covente, che a domandin a tancj di lôr, ma che nissun al met in vore, l’unic risultât jonzût a Bruxelles al è stât l’acuardi sierât cul Ream Unît.
L’intindiment di ducj al jere chel di convinci i sudits di Elisebete II a confermâ la partecipazion britaniche ae Union europeane in ocasion dal referendum che si fasarà ai 23 di Jugn. Par chel, David Cameron al à domandât une schirie di concessions cun chê di rinfuartî la cundizion speciâl dal so stât dentri de Union europeane e al à puartât a cjase rispuestis positivis pe plui part des sôs richiestis.
Ma cundut achel il “pericul brexit” nol è sghindât, stant che nancje tal guvier di Londre a son ducj in cunvigne cul incuilin dal numar 10 di Downing Street. Cun di plui, ator pe Europe, diviers di lôr si domandin se e je propit vere che la jessude dal Ream Unît de Union e sedi pardabon un fastidi o se nol sedi piês mantignî inpins cheste relazion anfibie e ambigue.
Par sigûr, cemût che e à declarât la premier scozese Nicola Sturgeon, se tal referendum a vincessin i inglês isolazioniscj, la Scozie e varès une reson in plui par volê la indipendence. Cuâl? Propit chê di  domandâ di «jentrâ in Europe». ❚
Marco Stolfo