L’ultim lavôr di dj Tubet al puarte gnove vite al rap furlan

“Jessî”, par lâ fûr des nestris presons e par tentâ di tornâ a cjatâ il nestri Jessi. Al zuie sul dopli significât de peraule “jessi” (cun o cence acent) l’ultin lavôr dal rapper Dj Tubet, alias Mauro Tubetti, che lu firme cul ex rapper dai Primo Impatto crew Ryuu (Emanuele Zucchiatti). «La cjançon e je impuartante parcè che o vin un altri rapper in marilenghe» al dîs Tubet «dopo il percors di Dlh Posse, Carnicats e Dj Tubet o podìn zontâ ancje Ryuu. Duncje o sin ae tierce gjenerazion di rappers in lenghe mari: un biel fat pe sene hip hop regjonâl che e sta cressint sedi pal talian che pal furlan, sedi tant che numar di artiscj che tant che nivel des rimis».
COLABORAZIONS
Di colaborazions e sperimentazions Tubet nol è gnûf. Di resint al à presentât il singul “Praise the Almighty” (preâ l’Onipotent), nassût in rêt cul artist gjamaican dancehall reggae Mikeylous, e cjantât in 3 lenghis: patois gjamaican, talian e furlan. Il toc al stât trasmetût ancje di radios inglesis e gjamaicanis. Il video uficiâl, diret dal congolês Souleymane Kane, al à la colaborazion dai atôrs furlan Giuliano Velliscig e congolês Oscar Kabeya. Par scoltâ chescj tocs e tancj altris che l’artist di Nimis al à metût adun in chescj agns, o cjatais une gnove compilation che si pues discjamâ sore nuie ae direzion: https://soundcloud.com/djtubet. «E ten dentri cjançons di plui stîi di reggae e rap, sedi in tiermins vocâi che strumentâi» al dîs Mauro «a son sperimentazions cun dutis lis manieris produtivis dal atari al campionator 12 o 16 bit, ai sintetizadôrs analogjics fin a rivâ al pc dal dì di vuê. Oltri che une varietât produtive e di gjenar, o vin ancje une varietât di lenghis miscliçadis, dal furlan al gjamaican al farsi al francês al talian, cun rimants ancje ae musiche popolâr».
TUBET PES SCUELIS
Vonde? Eh no, parcè che Tubet al è ancje impegnât a pandi la marilenghe tes scuelis: «O soi braurôs che i fruts di une scuele di Trep Grant a fasaran pe lôr recite il toc “Aghe” che o vevi scrit agns indaûr a partî des ideis di laboratoris fats cun fantats disabils» al conte «une biele gnove par me e pai fantats dai CSRE (Centris Socio Riabilitatîfs e Educatîfs)». Cun di plui, il rapper di Nimis al è tornât a fâ rimis tes scuelis dal Ial par sostignî «cheste robe epocâl dal furlan curicolâr», che us vin contât tal ultin numar de Patrie. ❚
Natascia Gargano