Che la economie furlane e fos in fin dai fats sane, si lu saveve za. E che il Friûl al ves passât miôr di altris areis talianis la grande turbolence de crisi internazionâl dai ultins siet agns, si lu saveve ancjetant. No maravein duncje – almancul sot chest profîl – lis conclusions de Ocse (Organizazion pe cooperazion e il disvilup economic), che su incarghe de Cciaa udinese e à puartât indevant une investigazion su la situazion e sui senaris di disvilup di Udin e dal so teritori. La Ocse di fat e conferme che, dâts ae man, la situazion dal Friûl e je miôr di chê di altris teritoris simii, no dome di Italie, ma ancje di Europe, e che il Friûl al à frontât la crisi in maniere tant plui solide di altris regjons e teritoris talians. No dome: secont la Ocse, Udin e il so teritori a àn potenzialitâts ancjemò no esprimudis, tacant dal turisim e dal atrat storic e culturâl (nô, intal nestri piçul, o zontaressin ancje chê enogastronomiche), potenzialitâts che però par cjatâ espression ur covente pardabon, par cierts viers, un cambi di mentalitât.
IL PERICUL DECLINISIM
La Ocse e viôt intal “declinisim” (il volê viodi e crodi che lis robis a van piês di cetant che nol sedi) il pericul plui grant: e chi, propit, tuart ae Ocse, no si jal pues dâ. Cussì come che no si pues no concuardâ cul fat che di ciert il Friûl – chê la sô economie e vîf soredut di trafic in esportazion, o sedi di une grande capacitât di competi a nivel internazionâl – al à di sburtâ l’aceleradôr sul front de vere inovazion, colegant in mût simpri plui “interconetût” Universitât, centris di ricercje e impresis. Insume, cun ricercje vere, che e produsi ricjadudis pratichis plui che publicazions par inricjî curriculums universitaris.
CUSSÌ UDIN
Simpri restant che il destin di Udin nol pues jessi diszontât di chel de Italie (atuazion e efiet des riformis) e de Regjon (che su la sô specialitât si impenzissin nûi simpri plui menaçôs), la Ocse e prefigure pe Capitâl dal Friûl e pal so teritori ancje la pussibilitât di deventâ un “laboratori di cressite”: il senari al è chel di podê sperimentâ gnûfs modei di riforme dai sistemis di lavôr, de burocrazie, dal benstâ sociâl. A leilu, dal sigûr interessant e “di sfide”. Secont la Ocse si scugnarès par altri “riviodi in maniere struturâl il sisteme de burocrazie, risolvint lis soreposizions di competencis tra ents e normativis regjonâls” e “riviodi in maniere struturâl il sisteme de istruzion, de formazion e dai servizis sociâi”, che al varès di produsi ricjadudis positivis su capacitâts ocupazionâls e produtivitât. Ma, soredut, si scugnarès “articolâ e creâ une Aree metropolitane tra Udin e i centris teritoriâi”. Secont la Ocse, Udin nol varès di sierâsi intai propris confins e, di altri bande, il teritori al scugnarès “relazionâsi a Udin par costruî une sole aree interelade”. Insume, al ven dit, l’impuartant al è lavorâ insiemi, vê une vision di sisteme. Facil di dî, forsit (cuasi dal sigûr, a dî il vêr) vuê plui dificil ancjemò di fâ, dopo il “slambrament” dal teritori provinciâl e la nassite di chês Uti che a van a pericul di fâ ancjemò plui burocratic e confusionari cualsisedi percors.
CUNVIGNE INTERNAZIONÂL
La Ocse intant e propon un grant avigniment internazionâl pal lanç des azions futuris de Agjende che e puartarà al Udin dal 2024. Al tiermin di chest Forum, e scrîf ancjemò la Ocse inte part finâl dal so Report “e varès di scomençâ la planificazion di un secont forum internazionâl là che e sarà butade une gnove idee di citât e un plan di azion che e varès di adatâsi ae strategjie che e rivuarde ce che al sucedarà intai 10 o 15 agns a vignî, par fâ di Udin un laboratori di cressite”. In sintesi: tra un pôc un prin forum, dopo un secont apontament internazionâl par butâ une gnove idee di citât e di futûr dal Friûl. Forsit la Ocse e à capît za che ae gnove organizazion teritoriâl volude de Regjon i volarà timp par metisi in moviment (e tra metisi in moviment e funzionâ e je une grande diference…). Intant il teritori al va a pericul di pierdi ocasions impuartantis di cressite e di disvilup. No volaressin pensâ che al sedi chel che, sot sot, si à voie di vê… ❚
Linux
