La linie feroviarie Udin Cividât e devente chê de “Il tren des lenghis” cun dute la cartelonistiche e lis informazions par furlan, talian, sloven, todesc e inglês

Sul binari e cor la locomotive, cun dutis chês lenghis e pâr une robe vive… mi ven tal cjâf Guccini intant che o spieti il tren te stazion di Cividât! Di cualchi dì incà alc al è cambiât, il tren “al fevele” plui lenghis. Avîs, tabelis, fintremai la vôs che mi dîs che il tren al è daûr a partî dal binari 2 e fevele la mê lenghe! Nol è un dai miei siums stramps, e je veretât. Di fat, in graciis di un protocol di intese jenfri la Agjenzie Regjonâl pe Lenghe Furlane (ARLeF) e la societât “Ferrovia Udine – Cividale” (FUC), al è partît un progjet di promozion integrade che al previôt di doprâ lis lenghis dal lûc (talian, furlan, sloven, todesc), adun cun chê inglese. L’obietîf al è chel di rindi plurilengâi i servizis e la imagjin visive de FUC.
E je daûr a nassi une ferovie pardabon speciâl dulà che, dongje des azions plui concretis (a saran in plui lenghis il sît internet e i materiâi informatîfs di cjarte, la segnaletiche, i anunzis sonôrs e i avîs), si previôt di meti in vore dute une schirie di ativitâts culturâls sedi sui vagons che in stazion.
La potenzialitât turistiche di Cividât e je grande, e podê rivâi cul tren al è un altri valôr zontât dal teritori. Lu à marcât ancje la Presidente Serracchiani in ocasion de firme dal protocol di intese, “il tren nol è dome un mieç par movisi, ma ancje di cognossince dal paisaç, de culture, de identitât dai lûcs traviersâts de ferovie”.
Il Friûl al jentre cussì ancjemò di plui tal cûr de Europe. Sì, parcè che il progjet de FUC al rispuint ad implen aes racomandazions dal Consei di Europe che, cu la Risoluzion 301/2010, al à sburtât lis regjons a cjapâ cussience dal valôr zontât des lenghis minoritariis tal disvilup dal turisim e de valorizazion dal patrimoni culturâl e ambientâl. Il marketing teritoriâl te lenghe locâl al funzione, propit parcè che al identifiche in maniere uniche il lûc che al promôf.
Pal president de ARLeF Lorenzo Fabbro cun cheste colaborazion “si concretize une operazion di politiche linguistiche e di marketing teritoriâl e aziendâl inteligjente e une vore pôc onerose che e podarès deventâ un model par altris concessionariis di servizi”.
Il tren al cor di corse, e lis sorpresis no son ancjemò finidis! ❚
Federica Angeli