FRIÛL EUROPE. Lenghis, dirits, autoguvier: Friûl, Scozie, Europe

I esams no finissin mai, soredut in Europe. Cun di plui, al pues sucedi che cualchi verifiche e vegni rimandade e spostade tal timp. Cussì, se doi mês indaûr o scrivevin che in curt a saressin rivâts in Italie e in Friûl i esperts dal Consei de Europe par viodi cemût che e je la metude in vore de bande dal Stât talian de Convenzion cuadri pe protezion des minorancis nazionâls, cumò o vin di segnalâ che il monitorament diret al vignarà fat plui indenant.
Par intant, in cont di minorancis, tutele e Europe, Rome e à tornât a cjapâ in man la pratiche dal proviodiment di ratifiche de Cjarte europeane des lenghis regjonâls o minoritariis. In cont dal argoment si à fevelât ai 21 di Avrîl stâts intune audizion alì des Comissions Afârs istituzionâls e Afârs forescj dal Senât. In chê ocasion, compagn che la dì prime a Udin, intant di un incuintri alì de Regjon cul viceministri pai internis cu la deleghe pes minorancis linguistichis, Filippo Bubbico, i rapresentants de Agjenzie Regjonâl pe Lenghe Furlane e dal Comitât/Odbor/Komitaat/Comitato 482, cjatant ancje la poie de Regjon, a àn tornât a bati sul fat che chê ratifiche e va fate e sore dut e va fate ben, cu la garanzie di nivei di tutele che a sedin almancul compagns di chei previodûts tes leçs statâls e regjonâl in vore.
I risultâts de ricercje sociolinguistiche fate de Universitât dal Friûl su incarghe de ARLeF, che a son stâts presentâts a Udin ai 22 di Mai – di dulà che a saltin fûr, tra lis altris, un interessant “rimbalç culturâl” positîf in cont dal ûs e de volontât di ûs de lenghe furlane, massime de bande dai plui zovins, e il lâ al mancul di tancj prejudizis cuintri dal furlan e de sô presince normâl inte societât, a confermin la validitât di chê prospetive. E soredut a mostrin che la Regjon e à di meti in vore une politiche linguistiche plui decise, plui coragjose e plui europeane. In chest sens ancje il risultât dal iter pe aprovazion dal Plan gjenerâl di politiche linguistiche si pues calcolâlu tant che un esam.
Ma no son sot esam dome il Stât talian e la Regjon Friûl-VJ. Un destin compagn lu à ancje la Europe e il so procès di integrazion, che al ven stazât in dutis lis elezions politichis che si fasin in ognidun dai vincjevot stâts de Union europeane. Chês dai 7 di Mai tal Ream Unît a àn cjapât sù a fuart cheste conotazion. Di une bande, la conferme dai Conservadôrs al guvier e il fat che i antieuropeiscj da Ukip no àn cjapât ducj i vôts che si spietavin a vierzin une gnove tratative tra Londre e Bruxelles prime dal referendum su la Ue dal 2017. Di chê altre, il sucès dal Partît nazionâl scozês al rinfuartìs il podê contratuâl de Scozie cun Londre e al vierç une gnove prospetive ancje tai siei rapuarts cu la Ue. ❚
Marco Stolfo