E continue la publicazion de Opera Omnia di Antoni Beline cun “Tiere di confin”

Chest libri si pues considerâlu une continuazion di Misteris gloriôs. Di fat al à la stesse struture di contis, fats, storiis, cavîi, filosofie di vite, sens religjôs de int. Il contest al è di cuant che pre Antoni al jere ancjemò impegnât come plevan te campagne de Cjargne a Rualp e Val e Treli. Come che l’autôr al à vût mût di dî, in chescj paîs lui al à imparade une gnove pagjine di teologjie, no fate di libris e di teoriis e elucubrazions astratis, ma di vite, di cuotidianitât. E je la vite di ogni dì, cun ducj i fastidis e lambics, il lûc là che si insede la religjon, il Signôr, la fede, il vanzeli come levan par movi la paste, come sâl par dâ savôr a lis strussis, come lûs par iluminâ il troi che si à di fâ dì par dì. Duncje un libri no «di contis o di sflocjis par ridi, ma la confession di un predi e di une int».
Come che i letôrs a san, pre Antoni al scrîf simpri cun chê scletece che i à partignût al so temperament. Par chel si à di svicinâsi ai siei libis cu la stesse serenitât, libertât e cence nissun prejudizi. Za lui al scrîf te sô jentrade: «Si à di leilu cun chel voli clâr e cun chel cûr libar ch’o ài doprât tal metilu jù». Dome cun chest spirt si rive a cjatâ dentri amôr pal Signôr e pes personis che no son in astrat, ma a àn nons: Marie da l’Anzule, Marie Vuiche, o Guizardo, pre Bepo… cu la lôr sapience, cui lôr cavîi, cu lis lôr debolecis e baronadis. E si scuvierç tal autôr ancje vêr amôr pal vanzeli, pe preiere, pe vite, pe onestât, pe dignitât. Se alc lu urte, e par chel pre Antoni si infoghe e si sfoghe, a son l’ipocrisie, la doplece, la arogance dal podê di cualunche bande che a vegnin, il doprâ lis personis par propris interès, o il lassâsi doprâ come mancjance di dignitât. La vite e à sens come servizi sclet e gjenuin pal om, pal ben, par dut che che al è vite, don di Diu, espression dal om, regâl de nature. Il rest al è fufignâ, coruzion, imbroi…, nol è vanzeli. Par dute la sô vite di predi, mestri, scritôr, om al à vût a cûr i principis di umanitât che al à di ispirâ ogni azion dal om e di incarnazion, intindint che la fede e il vanzeli a àn di insedâsi te vite concrete dai oms culì e vuê, se no a restin astrats, bielis peraulis e vonde.
Tiere di confin al fâs part di chei libris che l’autôr al veve za stâts publicâts prime di trasferîsi in planure e che no son plui reperibii. Al jentre tal nestri progjet di publicâ l’Opera omnia che Glesie Furlane e puartarà indenant fin che i mieçs economics lu permetaran, savint che tant al è ancjemò il materiâl inedit che al mertarès publicât se no altri par cognossi plui a font ce che al è stât pre Antoni tal mont culturâl, religjôs, inteletuâl, uman dal Friûl e pal popul furlan.
Il test di chest libri al è stât dome ritocjât par chel che i ten a la grafie, sistemantlu cu lis gnovis regulis. Si à lassât peraulis dopradis sul puest e che ancjemò i tancj dizionaris saltâts fûr no contemplin. Dongje des peraulis al è stât metût dome cualchi sinonim par judâ a capî, sperant che cul timp ancje chescj tiermins a jentrin a plen dirit tal vocabolari dai furlans rindintlu cussì plui siôr.
Lis preieris finâls a la Madone a son lassadis cu la variant cjargnele, parcè che nus à parût plui spontanie, cussì come che a son nassudis ta l’anime di pre Antoni.
Un grazie al Editôr Ribis che al à concedût la pussibilitât di cheste ristampe. ❚
Roman Michelotti