Lauc, e torne a vierzi la Buteghe di alimentârs

Al someave che l’an 2014 si fos puartât daûr ancje “Il girasole”, la uniche buteghe di alimentârs dal paîs di Lauc. E sarès stade une pierdite che di sigûr e varès contribuît ae murie dal paîs.
La CIC, Cooperative Indot Cjargne, dopo une atente valutazion, e à decidût di subentrâ ae vecje gjestion vierzint il “CIC Market Lauco”.
La Cooperative e à la sede a Vile Santine e e lavore sul teritori dal 1987: achì a vegnin fats prodots de metalmecaniche e e da lavôr a 26 personis. Tal 2000 la cooperative e à decidût di disferenziâ i afârs e e à viert une buteghe di alimentârs a Enemonç.
Di cheste esperience e je nassude ancje la presentazion dal progjet “VEM” (vicino è meglio) che Sabide ai 10 di Zenâr al è stât presentât a Lauc.
“Nô o crodìn tai piçui negozis di mont – al conte il president de Cooperative Stefano Adami – i nestris negozis a son un pôc particolârs parcè che a àn plui servizis: si puedin comprâ alimentârs, magari ancje ordenant la spese par telefon (la consegne in cjase e je gratis), si puedin mandâ fax, fâ fotocopiis… o cirìn di lâ incuintri aes esigjenzis de int e soredut cun presits une vore competitîfs. Chest parcè che o fasìn part di une grande cooperative che nus permet di podê comprâ i prodots a presits interessants. Il nestri investiment al è propit chest: cirî di dâ un servizi no costôs al utent finâl. Par di plui o vin decidût di cjapâ sù la siore che e gjestive la buteghe di prin par podê doprâ la sô grande esperience lavorative e sociâl madurade tai agns”.
Dal sigûr al è un segnâl positîf par Lauc e al podarà jessi un esempli ancje par tancj paisuts di mont cjargnei che a son simpri plui in dificoltât: sigûr al è un moment indulà che lis ativitâts a diminuissin, di conseguence simpri plui i puartons des cjasis si sierin.
“Jo o soi nassût e cressût in Svuizare ma o ai decidût di tornâ a vivi achì, parcè che o crôt in cheste tiere. Jo o crôt inte Cjargne – al siere Stefano – e tai cjargnei. O vin dome di creâ une mentalitât plui elastiche e o vin di vierzisi di plui aes novitâts e crodi di plui intes nestris capacitâts. Il destin de Cjargne al è tes nestris mans. Tornâ a vierzi une buteghe al è pensâ che i piçui paîs a puedin tornâ a vivi e a jessi plens di int che e à voie di vivi tal so teritori”. ❚
✒ Marta Vezzi