GLESIE FURLANE: (cuinte e ultime pontade) Conclusion

Ai 19 di Novembar dal 2013, a Palaç Belgrât tal Salon dal consei provinciâl, si è tignude la taule taronde “TUTELE DE LENGHE FURLANE E LA EUROPE: Lenghis, Religjon, Scuele in Friûl”. L’event al jere inmaneât dal grup di studis storic Historia di Pordenon e de Provincie di Udin.
In chê ocasion al è intervignût ancje pre Roman Michelot cuntun intervent sui 40 agns di ativitât di Glesie Furlane. O presentìn ai nestris letôrs il so intervent.
(cuinte e ultime pontade)
[…] CONCLUSION
O pensi che al sedi dovê de Glesie, no dome dal nestri grop, tramandâ il vanzeli, la Buine Gnove, in chest teritori, in cheste culture, in cheste realtât che no il caprici ma la storie e à costruît. Il principi de incjarnazion, di cjapâ sù cheste cjar al è un fondament de fede cristiane. Magari cussì no la gjerarchie ancjemò vuê no jude in chest sens. Tant al è vêr che a Visepente dulà che pre Antoni al à celebrât par 25 agns e di altris bandis e di sigûr tai miei paîs, cuant che no sarai plui, e tornarà la “normalizazion”, si sierarà – finalmentri par lôr – la parentesi. Chest mi da aviliment e marum! Par chest lu vin dit di un pieç e lu continuìn a dî che e mancje une sielte clare e impegnative in chest cjamp di bande de gjerarchie glesiastiche nostrane. La Glesie e lote par certs valôrs e principis “no-negoziabii”. Ma il dirit naturâl di doprâ la proprie lenghe par dut, ancje te liturgjie, nol è tra i principis e valôrs “no-negoziabii”.
Tal lôr setôr di competence ancje lis grandis istituzions de societât a varessin di fâ, la stesse sielte clare e impegnative: scuele, universitât, mass-media, economie, politiche… No podìn acusâ la int, il popul furlan di disinterès e di volê bandonâ la proprie lenghe. I furlans di bessôi in maniere spontanie par secui a àn doprât la lôr lenghe, le àn salvade, e ancjemò tancj lu fasin. Pluitost lis istituzions a son stadis latitantis, o, piês, a àn fate la vuere cuintri de lenghe, a àn judât a fânus pierdi la stime, la dignitât, il valôr dal nestri patrimoni culturâl. A son lis istituzions in debit cul popul.
A son lis sieltis concretis che a stabilissin la difese e la pupilance o mancul di chescj tesaurs. No sai se l’Ufici scolastic regjonâl al à lavorât in chest sens, ma se al ven trasferît tal Venit, o ai i miei grancj dubis che al rivi a fâ alc in pro dal Friûl….
Impegnâsi ducj a operâ, riparâ e creâ cussience, dignitât, stime nol è mai fûr timp, nol è mai timp pierdût, no son mai risorsis straçadis. E la sperance no mûr.
[Fin] ❚
pre Roman Michelot