SPECIÂL – «Il pridicjadôr socialist»

Giovanni Minut (dispès clamât Zovanin o, a pont, Zuan) al jere nassût a Visc ai 26 di Dicembar dal 1895 di une famee contadine. Di zovin al frecuente la scuele serâl agrarie di Gurize e cuant che e sclope la prime vuere mondiâl si ricjate cu la divise austriache, prime tes retroviis dal Friûl orientâl e po sui confins a soreli jevât dal Imperi. Finide la vuere, si bute ad in plen inte militance politiche, ma soredut sindacâl prime cul partît socialist e po, cu la crevadure dal ’21, cui comuniscj. La sô passion, la sô preparazion e la sô capacitât oratorie lu puartin in curt a deventâ segretari de Federazion Provinciâl dai Lavoradôrs de Tiere, la leghe rosse dai contadins ative intal ex Friûl imperiâl.
Lu cjatìn protagonist intes lotis dai contadins e dai sotans dal Friûl orientâl cuintri de azion simpri plui agressive dai proprietaris locâi e daûr di un cambiament politic e aministratîf traumatic (cheste zone dal Friûl e jere stade, di fat, sot dal Imperi austriac par almancul cinc secui). Ancje lis concuistis sindacâls e sociâls otignudis prin de vuere a vegnin metudis in discussion dal gnûf ordin politic.
In curt al devente un dai personaçs plui cognossûts dal Friûl orientâl e un dai plui amâts de int. La sô figure e cjate un rivoc grues ancje su «Il Lavoratore della Sera», cuotidian dai socialiscj stampât a Triest, là che al ven sorenomenât «il pridicjadôr socialist» e presentât come «il giovane compagno Minut che nelle riunioni fevele simpri furlan». Minut, di fat, lu fevele simpri tai siei comizis e, ancje par chest, si cjate a ce fâ dispès cui carabinîrs che i proibissin di fevelâ te sô lenghe, come che i capite tal Març dal 1920 a Lonzan. Cuant che po, tal Mai di chel stes an, al ven arestât a Tierç tant che al cîr di fermâ i carabinîrs che a vuelin secuestrâi il fen a di un contadin, si discjadene il montafin: i lavoradôrs de tiere, ma ancje i operaris di Monfalcon si movin par liberâ il lôr «eroi».
Minut al pant un amôr totâl pe sô lenghe, pe sô tiere e pe sô int: intal 1921 al publiche ancje un librut di poesiis fûr dai schemis de poesie furlane par stîl e contignûts (cun tescj di denuncie sociâl e antimilitariscj). La publicazion i discjadenarà cuintri dute la asse di une cierte part dal mont culturâl furlan che le judiche scandalose. Tal 1923 al emigre in Sud Americhe, prime in Argjentine e po in Uruguay, là che si fasarà un non te industrie dal lat. A obleâlu a cheste sielte e je la campagne difamadorie inviade cuintri di lui dai siei aversaris politics e dai siei ex compagns socialiscj daspò de decision di passâ cui comuniscj. A cheste situazion si zontin lis violencis simpri plui pesantis cuintri di lui e de sô famee de bande dai fassiscj. Ancje Minut, duncje, come tancj altris militants antifassiscj al scugne cjapâ la strade amare dal esili.
Carli Pup