GLESIE FURLANE: 40 agns di impegn pe lenghe e culture furlane

O puarti a ducj i presints, autoritâts, organizadôrs di cheste Taule taronde e relatôrs, il salût di bande di Glesie Furlane e La Patrie dal Friûl.
Al fâs plasê viodi un biel grop di zoventût presinte a chest incuintri e su chest argoment.
Un salût particolâr mi permet di fâlu al prof. Aureli Argemì. Cun lui si sin incuintrâts ancjemò tal 1989 (12 e 13 setembar) a Riu Vert, sul teme “Minorancis e pâs: se tu vuelis la pâs rispiete lis minorancis”. A conclusion di chestis dôs zornadis o vin publicât un document impuartant “Se o volês la pâs rispietaitnus ancje nô”. Al jere in riferiment a la zornade mondiâl de pâs proclamade dal pape par chel an.
O ringrazii il prof Cevolin pa l’invît che mi à fat si partecipâ a cheste Taule taronde.
***
La nassite di Glesie Furlane
La Associazion Glesie Furlane e je ative dai prins agns 1970. Al jere a pene concludût di cualchi an il Concili, che al veve puartât gnovis visions, gnovis liniis pe Glesie, tal cjamp de eclesiologjie, liturgjie, Sacre scriture, ecumenisim, dialic cul mont, cu la societât e la culture moderne …. Visions, liniis e sperancis che si son un pôc fuscadis cun pontificâts sucessîfs.
Tal contest conciliâr, si inviarin iniziativis ancje in Friûl e te nestre glesie. Al val la pene di ricuardâ une straordenarie iniziative dai predis “La Mozion dal clero” tal 1967, poiade prime e po scjafoiade dal vescul Zaffonato su pressions politichis, in particolâr democristianis. Al fo, chel, un piçul document di Teologjie de liberazion in clâf nostrane.
Al centri di tantis iniziativis di chei agns al fo pre Checo Placerean, pont di riferiment iniziâl di Glesie Furlane.
Principis orientatîfs e fondatîfs de nestre Associazion
1. La valorizazion des glesiis locâls cuintri dal centralisim roman, che di masse timp ormai al scjafoiave e al uniformave teologjiis, liturgjiis, cjants, sensibilitât, organizazions eclesiâls, tradizions profondis e vitâls. Rompi lis struturis di fier nassudis tal Concili di Trent e riproponi un cristianesim plui des origjinis che al garantive un san pluralisim di Glesiis. Pe nestre Glesie il riclam al Patriarcjât al veve chest significât.
2. In linie cul gnûf Concili, promozion de liturgjie te lenghe dal popul. Di chi, po, e je nassude di tradusi la Bibie, il Messâl, i tescj liturgjics…
3. Fâ cognossi la vere muse uniche e origjinâl de Glesie dal Friûl che, pe sô posizion gjeografiche, e palesave une realtât multiculturâl. Di fat culì di secui a convivevin furlans, slovens, todescs, oltri che talians. Ma la gjerarchie glesiastiche no veve mai tignût cont di cheste realtât. Lis ricjecis a jerin deventadis disgraciis. Di fat cualchi vescul plui iluminât, come Fogàr a Gurize, che al veve cirût une strade di rispiet de multiculturalitât de sô glesie al stât tirât jù a Rome in pension prime da l’ore.
Il Friûl si cjate tune posizion uniche e invidiabil al centri des trê grandis civiltâts europeanis: latine, slave, gjermaniche.
4. Une gnove pastorâl plui leade al popul, a la realtât sociâl e culturâl. Il sproc che che o baterin in chei agns par predis e gjerarchiis, al fo: “Tornâ cu la int”, o, par dîle cun pape Francesc in timps plui resints:“Vê l’odôr des pioris”.
Une ocasion particolâr e vignì dal Congrès Eucaristic Nazionâl organizât a Udin tal 1972 cu la presince dal pape, Pauli VI. In chê volte si celebrarin Messis in tantis lenghis, ancje in Sinti, justamentri stant la lôr presince tal teritori, ma nuie par furlan. I furlans no esistevin nancje pe Glesie.
Alore e je partide une reazion fuarte, grintose ancje dentri de Diocesi. Glesie Furlane e à vude une funzion determinante massime te Semblee dal Clero tal 1975, cuntune presince numerose di intervents e cuntune linie ben marcade che e à lassât il segn.
Lis ideis di Glesie Furlane no les à inventadis pre Checo, lui al è stât l’interprit miôr e plui madûr in chê volte; ma a partivin di lontan, di tant lontan. E par chest bisugnave cognossi la storie, la nestre storie ancje glesiastiche: ce che e je stade Aquilee dal pont di viste glesiastic. […] ❚
(al va indevant sul prossim numar).
pre Roman Michelot