LA CUISTION DES PROVINCIIS. Il dirit di votâ al è fondamentâl. La peraule al President Enrico Gherghetta

“No si pues consegnâ lis Provinciis a int che no je votade dal popul, parcè che al vûl dî fâ sù un caroçon che nol rispuint ai citadins”. Cussì il president de Provincie di Gurize, Enrico Gherghetta inte sentade de Assemblee regjonâl de Upi, davuelte ai 27 di Setembar stât a Pordenon.
Il teme di fonde, al sosten Gherghetta al è rispuindi a dôs domandis par scomençâ a riformâ: “Volìno une regjon des autonomiis o une regjon centralistiche? Soredut, ce nus covential”? Invezit di tacâ a meti man partint des Provinciis, la sô convinzion e je che bisugne partî cambiant la Regjon cun trê azions. “Prin di dut dividi il podê aministratîf di chel legjislatîf; po scancelâ il 50% des leç, parcè che no si pues passâ la vite a messedâ cjartis; cun di plui disboscâ dute chê schirie di ents di secont grât – consorziis e vie indevant – che a robin democrazie e che a son un cost”. Dome dopo che si à proviodût in cheste direzion, al è il pinsîr di Gherghetta che al à pandût a clâr te Assemblee Upi, si podarà passâ a fevelâ des Provinciis.
“Par chel che al rivuarde Gurize, fasìno une fusion cun Triest? La cuistion no mi preocupe. Jo mi ocupi prin di dut des personis, duncje di democrazie, – al à zontât – no di teritoris”. Dut câs Gherghetta al à esprimût la convinzion che “Comuns e Provinciis a son un sparagn pe spese publiche, no une straçarie” e che par saltâ fûr de crisi e par impastanâ un gnûf model di svilup si à dibisugne di “plui e no di mancul democrazie”.
Ae president de Regjon Debora Serracchiani, che tal Mai stât e je stade a Gurize a presentâ la volontât di riforme ancje par chel che al rivuarde lis Provinciis, Gherghetta – che al è dal Pd tant che jê -, i veve dit: “Ti judarin e sostignarìn in dut, fûr che par une robe”, fasint riferiment propit ae riforme che e scancele lis Provinciis. . ❚
✒ Antonella Lanfrit