SLOVENIE. La Slovenie no je la Grecie, ma…

L’AUTÔR. Une firme internazionâl prestigjose e comparìs di chest numar sul nestri gjornâl.
Franco Juri al è nassût a Cjaudistrie (Koper) in Slovenie/Jugoslavie intal 1956 di pari furlan e mari cravuate. Gjornalist e vignetist satiric, diplomatic, ex parlamentâr sloven, al colabore cun testadis slovenis e talianis. Intai Agns ’80 e ’90 si è interessât di dirits umans e al è stât deputât intal prin Parlament di Lubiane elet in maniere democratiche. Dopo la indipendence de Slovenie, intai guviers di Janez Drnovšek, al à vût incarghis impuartantis inte diplomazie dal so Paîs: ambassadôr in Spagne e a Cuba, e segretari di Stât ai Afârs forescj.
***
In veretât, la Slovenie e reste lontane de Grecie, viodût che e pues ancjemò esibî parametris macroeconomics no tant diferents di chei europeans medis e di paîs calcolâts stabii. Par esempli, il so debit public al rive a cirche il 50% dal PIL, intant che chel medi de zone euro – secont Eurostat – al è dal 87,4%, e chel talian invezit dal 119,4%. Ancje la inflazion e la disocupazion a restin su lis mediis de zone euro, intant che il deficit al cîr di cressi e al tocje cumò il 6,4% dal PIL. Secont il guvier, a coventin tais drastics ae spese publiche; i siei critics invezit a visin che la politiche radicâl di austeritât inviade intal ultin an – cun tais ai salaris, aes pensions, cui licenziaments e cul aument de disocupazion soredut dai zovins, dut acompagnât di une politiche fiscâl rigjide – e je daûr a maçâ la classe medie, metint in zenoglon i servizis publics e distruzint il marcjât interni. L’efiet al è deleteri e di tai argjentin intal periodi Menem. Il disvilup al è paralizât, il paîs demoralizât, lis jentradis a son ridotis ancjemò di plui e il deficit al cres; la fuide di cerviei e devente une prassi cuotidiane. Cui che al pues al va. Dut al devente, pai voi e pal stomi dal citadin sempliç, ancjemò plui grivi di acetâ cul cressi dai câs di coruzion, clientelisim, nepotisim, vantaçs e impunitâts de caste politiche.
In chestis circostancis, ancje la proverbiâl trancuilitât mitteleuropeane, la diligjence, la laboriositât e la ubidience slovene no son bastadis a evitâ la place. La rabie – sclopade prime a Maribor par vie di un sindic corot e arogant e di un clericât, il stes che al poie Janez Janša, cu lis mans in paste intal crack finanziari plui distrutîf inte storie de glesie e che al à fat sbalotâ fintremai il Vatican, o ben chel des societâts Zvon 1 e Zvon 2 di proprietât de Arcidiocesi di Maribor – si è difondude in curt a dut il paîs, no simpri in tiermins articolâts in maniere politiche, e cuntune fuarte vene antipolitiche.
L’ultin scandul, emerzût cul rapuart de Comission pe lote ae coruzion che e à documentât agns di mancjade denunzie dai redits de bande dai doi politics slovens principâi, il prin ministri Janša e il leader de oposizion – e ancje sindic di Lubiane e imprenditôr – Zoran Janković, al à butât gnûf vueli sul fûc. Tant plui che i doi politics di ponte, invezit di dimetisi, a son lâts indevant a fâ i furbuts, cirint di sghindâ lis acusis e stiçant il scuintri ideologjic.
Janez Janša al à cirût di difindisi clamant in cause la poie dal president dal Consei European, che si è cjatât in situazion cetant intrigade. In veretât Herman Van Rompuy nol à confermât, e nancje contradit la presumude poie al prin ministri sloven. ❚
(Al va indevant).
✒ Franco Juri