SPECIÂL – lapatriedalfriul.org: un archivi par ducj

www.lapatriedalfriul.org: aromai di plui di un an al è stât screât il gnûf sît dal nestri gjornâl. Tal imprin, te pagjine principâl (o ben, chê che si clame «home», «cjase» par furlan) a jerin a disposizion i «pdf» (documents che si puedin vierzi cun tancj programs) dai numars publicâts. Dut cjamât daspò dai 15 dal mês, a Patrie bielzà rivade ai abonâts e tes librariis e ediculis che nus ospitin. I pdf a vevin une definizion basse che e permeteve di lei il test ma no di viodi in grant disens e fotos, juste par «ingolosî» cui che nol cognosseve la riviste.
GNOVE IMPOSTAZION: L’ARCHIVI_Cul tacâ dal 2009 o vin decidût une gnove fate pai contignûts. Simpri dopo de metât dal mês, a vignaran metûts ducj i articui dal mês passât in formât web, intant che il numar gnûf  al è daûr a rivâ ai abonâts e tes librariis e ediculis che nus dan acet.
I tocs sul web, duncje, a podaran jessi «linkâts» (o ben, segnalâts par mieç di un colegament li di un altri sît), consultâts, magari ancje copiâts in mût plui facil, cu la sperance dome che e sedi citade simpri la «risultive» de notizie.
Meti a disposizion sore nuie l’archivi di un gjornâl e je la ultime tindince dal web, come che nus spiegave Sergio Maistrello (intervistât ancje in chest numar tes primis pagjinis) intun articul te Patrie di Lui (direzion web dal toc www.lapatriedalfriul.org/?p=237). La motivazion e je che chestis pagjinis a clamin «trafic» e la publicitât e ven plui lete. La nestre motivazion e je chê, vivint ancje di contribût public in gracie de leç 482, di cirî di dâ un servizi a di ducj.
UN IMPREST DI DOPRÂ AD IN PLEN_Il sît al fasarà di archivi simpri consultabil, duncje. L’auguri al è che cheste pussibilitât e sedi doprade ad in plen: par internet al è dificil cjatâ une schirie di articui in lenghe cussì siore, merit di ducj i nestris brâfs gjornaliscj e colaboradôrs.
Dree Venier