DIBATIT LETERARI. 50 sfumaduris di… “zâl e blu”

Ise dome une coincidence che il libri furlan dal moment (Ses e Barete di Francesca Gregoricchio) e chel a nivel internazionâl (Fifty Shades of Grey di E. L. James) a sedin ducj e doi dai libris erotics cun des visions femininis sul mont dal ses? O ise invezit une prove che la leterature furlane e rive a metisi in sintonie cu lis tindincis e lis esperiencis di chê globâl?
Al sarès biel se e valès la seconde ipotesi ma la prime e je chê che plui probabilmentri e je vere.
Il svicinâsi de gnove edizion dal premi Sant Simon, al puartarà ancje chest an a domandâsi cuâl che al è il stât di salût des letaris furlanis. De manifestazion di Codroip, e in particolâr de so zurie cun figuris come Tolazzi e Marchetta, al è nassût tai ultins agns un dibatit vivarôs e ruspi.
“In Friûl si lei pôc e si scrîf mâl”, al à tornât a disi Tolazzi intune resinte interviste al setemanâl “Il Friuli”.
La sô posizion e je valide e di condividi par tantis robis; pes tematichis no tradizionâls che si varès di vê il coraç di frontâ, pal sburt tal confrontâsi e tal lei i autôrs forescj contemporanis e tal savê meti la muse fûr di cjase.
A son riflessions che a valin no dome pe culture ma par dute la societât furlane di vuê (e cence limitâsi a chê furlanofone).
Al va dut câs dite che, fasint un belanç dal dibatit che si è davuelzût tai ultins doi, trê agns, su la stampe si son ancje inviadis des dinamichis negativis dutis particolârs.
Plui di cualchidun, a voltis cun ignorance altris cun malizie, al à fat ecuazions une vore arbitrariis che a an puartât a atacâ la leterature furlane tout court par obietîfs politics, come par esempli il fâ coincidi cualsisei difese dal furlan cul jessi de leghe nord o il fa jentrâ la dimostrazion dal disvalôr de lenghe furlane tal cjalderon des lotis pe spartizion dai bêçs a nivel regjonâi fra Triest e il Friûl.
Dut chest al è e al à la vût sô influence sul dibatit ma nol à di puartà, par reazion, a une difese incondizionade de leterature furlane, dulà che ducj i autôrs a finissin cul jessi bogns, brâfs e meritevui di finî dentri a une gnove edizion de antologjie dal Verone.
Al di lâ di dut lis cuistions di font solevadis di Tolazzi a restin e a van frontadis. ■
Maurizio Biasizzo