IL FRIÛL FÛR DAL FRIÛL. For di Avoltri: une lungje storie di emigrazion feminine

For di Avoltri cun “Donna ed Emigrante” al à savût ufrî un libri di cualitât, dulà capî cemût che tai secui e je cambiade la emigrazion e la vite des feminis. Tullio Ceconi, curadôr de publicazion, insieme a Annalisa Vacusa, Novella Del Fabbro, Rita Ceconi, Nelio Toch, Chaterine e Liliane Tamusin, al à racuelt e rielaborât testemoneancis e fat un studi critic sul fenomen de diaspore des feminis, pôc contât, se no midiant dai solits canâi de retoriche.
Il libri (222 pagjinis) che al fâs part de golaine di ricercjis storichis sul fenomen migratori dal Comun di For di Avoltri, al ribalte il pensâ comun dal om emigrant e de femine a cjase a tirâ sù i fîs o al massim agregade a lui tal paîs ospitant. Lis feminis di For di Avoltri, tant che la maiorance di chês cjargnelis e furlanis, a son di simpri grandis lavoradoris, in famee, te stale, tai cjamps, tal lavôr artesanâl e in fabriche. I archivis dal paîs gortan nus fasin capî che lis zovinis a partivin za pes atuâls Svuizare, Romanie, Slovenie, Ongjarie, Cravuazie e Austrie tal 1600, par lâ a servizi tant che massariis, braçulis, ma ancje contadinis e adiriture “cramârs”. La industrializazion dal 1800 e puartarà a deventâ operaiis un grant numar di fornesis diretis viers lis fabrichis de plane furlane, de Italie e dal imperi austroongjarês. Clâr al è che no esisteve une etât di passaç de  infanzie ae etât lavorative: lis feminis di For, dopo vê alternade scuele elementâr e lavôrs tai cjamps, tal bosc o te stale, a partivin pe fabriche o pes cjasis dai siôrs tor i 13/14 agns. La prime vuere mondiâl e segnarà un sconvolziment sociâl gravissim pe int di For di Avoltri: il front al jere stât plantât propit tai pascui, dulà che la int e lave a tirà sù fen, e i fuarts leams jenfri i cjargnei e i vicins austriacs a alimentaran tes autoritâts dal Ream di Italie un clime di suspiets pesants. I bombardaments, lis distruzions, i corots, la burocrazie a discjarnaran ancjemò di plui la mont. Tal 1919 dut al jere cambiât e il flus migratori viers la “defonte” monarchie asburgjiche si bloche a pro des rotis viers la lontane Americhe e la Italie. Sot il fassisim si slargje te borghesie urbane la mode o la esigjence di vê une femine a “servizi”: chês dal Friûl a jerin particolarmentri gradidis parcè che a jerin determinadis e scolarizadis. Rome, Gjenue, Milan, Vignesie, Turin a saran lis localitâts che a daran plui lavôr ancje aes zovinis di For, che cui lôr sparagns spes a cuistavin la dote par maridâsi, o animâi pe famee restade a cjase. La seconde vuere mondiâl e discjarnarà ancjemò di plui la Cjargne: cu la pâs dal 1945 si tornarà a emigrâ simpri plui viers lis citâts de Italie, viers la Francje e oltri ocean. Gnove destinazion pes nestris fornarinis e sarà la Gjermanie concuistade dal gjelât dai Cjadovrins che a vignivin in Cjargne a cirî lavoranzie feminîl che e lave vie di cjase pe stagjon. L’ultin grant e particolâr fenomen migratori “colôr di rose” al sarà tor il 1966, cuant che – dopo la ruvinose aluvion dai 4 di Novembar – al partì un zimulament tra Como e For di Avoltri. L’industriâl di Lurate Caccivio Rodolfo Tettamanti, proprietari de omonime industrie dolciarie, al veve bisugne di lavoranzie stagjonâl pe produzion di panetons e di colombis. A For, in plui de risultive de future aghe “Goccia di Carnia” di lui fondade, al cjatarà une cincuantine di feminis che par agns prime di Pasche e di Nadâl a emigraran a fâ dolçs e a fâ inamorâ tancj zovins comascs. La storie de diaspore di masse e finirà, come in dut il Friûl, tai agns ’70 cul disvilup dal turisim e cu la industrializazion dal fonts de val, ancje se il dispopolament dal paîs al è continui: al baste pensâ che tal 1961 a vivevin tal comun di For 1449 personis e tal 2001 dome 734. Tra lis riis dal libri une cjosse e je evidente: centenârs di agns di vite di mont e di emigrazions a son cambiâts dal zîr di pôcs  decenis. Dut al è cambiât, forsit inesorabilmentri, e no sin ciertamentri noaltris che o podìn dî se in miôr o in piês. ■
Daniele Martina