CULTURE – ART-Â. Antologjie de grafiche “made in Friûl” a Vile Manin

Oparis grafichis di artiscj dal Friûl, testemoneancis preziosis de culture dal teritori, che a pandin une ricjece artistiche, a voltis, sotvalutade, parcè che tignude, a tuart, tant che art minôr. A son esponudis a Vile Manin di Passarian, te esedre di Jevât, e a vegnin de colezion di art de Fondazion Crup. Fatis te seconde metât dal Nûfcent e scuasi dutis ineditis, lis oparis grafichis – plui di otante – lis à metudis dongje la Trienâl europeane de incision te suaze de esposizion “Cjartis preziosis”, inmaneade in colaborazion cu la Regjon.
Si puedin amirâ grafichis di Giovanni Saccomani, pitôr di gjeni che al fo ancje ae Bienâl di Vignesie, oparis di Fred Pittino, tra i prins a sprovincializâ la piture furlane, di Ernesto Mitri, pitôr e mosaicist, e di Marcello D’Olivo, architet cetant innomenât e ideatôr de Spirâl di Lignan. La antologjie di grafichis “made in Friûl” e va indevant cun Francesco Bierti, moderni continuatôr de “Scuele di Glemone”; Bepi Liusso, cjantôr dal paisaç urban di Udin e Grau e de vite di ogni dì dal Friûl; Tranquillo Marangoni, xilograf di gale; Guido Tavagnacco, ritratist e acuarelist.
E po cun Luciano Ceschia, scultôr e ceramist, Giuseppe Zigaina, fondatôr de Trienâl europeane de incision, e Giordano Merlo, par agns anime dal Centri furlans arts plastichis.
E ancjemò, grafichis di Renzo Tubaro, che al lassà frescs preseâts in cetantis glesiis dal Friûl; Giorgio Celiberti, protagonist di events artistics talians e internazionâi, che za a 19 agns al esponè ae Bienâl di Vignesie; Mario Micossi, incisôr strasordenari cuntune tecniche cetant rafinade; Mario Baldan, Arrigo Poz, Nilo Cabai, Tonino Cragnolini.
Devant de impuartante schirie di oparis dai autôrs ricuardâts (che a son dome une part di chei in mostre a Passarian), vere antologjie de grafiche regjonâl, si varà di cjalâ cuntun voli plui atent – al consee il president de Trienâl, Giuseppe Bergamini – chê che dispès e je tignude tant che une espression di art minôr rispiet ae piture di cavalet, par vie di prejudizis, mai superâts, peâts ae pussibilitât di moltiplicâ il prodot artistic, come se la serialitât dal stes e les in dam de invenzion e de realizazion.
Cun cheste mostre la Trienâl de incision e fiesteze i 30 agns di ativitât. Pe ocasion e à inmaneât ancje une altre esposizion – “Incision contemporanie in Friûl” – te vecje glesie di Sant Gregori a Sacîl.
Erika Adami