EDITORIÂL – Cjalâ indaûr par lâ indevant

O cjalavi chê altre dì la scrite sul gnûf centri de cjamare di cumierç di Udin: par talian, e diseve “Di chi al scomence il doman dal Friûl”.
O ai pensat che une considerazion dal gjenar e jere tant falade. Cemût si puedial fevelâ di avignî partint dal vuê e no dal îr?
Al sarès scancelâ, in non de modernitât, chel che o sin stâts, ancje tal mont dal lavôr, da lis impresis.
Discors diviers invezit se si vûl presentâ i furlans come chei che a son pronts a tornâ a scomençâ, a scuvierzi il gnûf, tantis voltis a previodilu.
Chest numar, il prin dal an, al somee fat a pueste par rispuindi a la cuistion. Prime di dut de cuviertine che e rapresente une foto scatade dai prins dal ‘900: la famee furlane in taule, cence l’om emigrât in Siberie cun tancj di lôr a tirâ sù la ferade. Cheste figure le vin decidude par contâ i dîs agns che a van dal 1900 al 1910 in Friûl e o larìn indenant par ducj i mês in cheste maniere fint al 2010. O viodarìn il struc dal deceni e un aveniment che o vin considerât particolarmentri significatîf de nestre storie.
Un tant par rispuindi ancje a dute la retoriche che nus soflarà sul cuel par celebrâ la unitât di Italie.
Ma soredut par tignî il leam cul nestri passât, par cognossilu fin insom e scuvierzi ancje tantis robis che no nus àn mai contât.
O saressin ancje gnognos a no savê fâ front a lis sfidis di chê modernitât che si presente denant dal Friûl di vuê. Lu fasìn vierzint un spazi impuartant dal giornâl a ce che al ven fûr di Internet, cuntune altre osservazion: se une volte la cognossince des novitâts, che a jerin tecnichis, ma ancje di pinsîr, e rivave in Patrie puartade propit dai lavoradôrs emigrâts pe Europe, cumò e zire pe Rêt. Dispès a son propit i zovins furlans, soredut laureâts, che a àn scugnût lâ vie di chi a cirî lavôr, chei che a àn plui ideis, chei che, a la voie di tornâ, a zontin la idee di no jessi sotans a di nissun, braurôs de lôr identitât.
Un sfuarç gjornalistic duncje di tignî dongje dôs musis de stesse medaie: cussience di cui che o sin e sfide dal dì di vuê.
Il dut intune prospetive di gambiament, parcè che cence la convinzion che alc si pues fâ, par no finî te vuate dal consumisim di une societât dulà che il model al sta tes gjambis des escort e no tal çurviel di une frute che e studie o e lavore, ancje lis celebrazions par ricuardâ il riviel de Joibe Grasse a puedin jessi dome retoriche e folclôr.
I ribaltons no son dome materie di studi e fiestis, ma insegnaments di dignitât e cussience di doprâ.
DREE VALCIC