CULTURE. Necropoli, il libri

Cjamp di concentrament di Natzweiler-Struhof in Alsazie, 800 metris di altece, su lis monts. L’om che al rive, intun dopomisdì di domenie cuntun grup di turiscj nol è un visitadôr come chei altris: al è un ex prisonîr che dopo tancj agns al à volût tornâ tai puescj dulà che al jere stât internât. Subit, denant des barachis e dal fîl spinât trasformâts in museu, la memorie e tache a cori e i ricuarts a vegnin sù cu la lôr cjame di dolôr e rabie. A tornin la soference pai insults, il dûl profont par ducj chei che, la plui part, no le àn puartade fûr. E come fotograms di une pelicule, impresse tal cuarp e te anime, a corin lis infinidis vicendis che a fevelin di un orôr che in nissune maniere si rive a motivâ, ma insiemit ai tancj episodis di solidarietât tra prisonîrs, di une umanitât mai dal dut sconfite, di un desideri di vivi che nancje in situazions cussì dramatichis si è mai pierdût dal dut.
Scrit cuntun lengaç crût che nol cole te autocomiserazion, Necropoli al è un libri autobiografic intens e sconvolzent. E se Boris Pahor nus conte la sô esperience dal mont crematori parcè che la memorie no si pierdi e la storie no sedi passade dibant, chê che nus da no je però dome la testemoneance fedele des atrocitâts dai lager naziscj, e je ancje un document emozionant su la capacitât di resisti e su la gjenerositât dal om.
Christian Romanini