CULTURE. L’università friulana di Joseph Gentilli 1965/66 – due saggi di pianificazione universitaria

L’Istitût ladin-furlan ‘Pre Checo Placerean’ al à dât vite a cheste golaine di studis sul autonomisim, rivade cumò a 12 volumuts. Il numar 11 al à il mert di fâ cognossi la figure di chest preseât gjeograf e climatolic (nassût a Sant Denêl intal 1912, e muart intal 2000), professôr inte  universitât australiane di Perth (un dai tancj cjâfs fins che la Italie no à volût vêju… ma, si capìs, al jere ebreu!), ma simpri atent al Friûl e a ce che al sucedeve chenti. Tant atent, di sei stât un profete de universitât furlane, sicu che si capìs dai doi saçs publicâts in chest volumut (40 pagjinis), insiorâts di tabelis statistichis e di cjartis gjeografichis a teme. Il prin saç al fo publicât intal 1965 tal boletin uficiâl de cjamare di cumierç; il secont intal 1974 sul ‘Corriere del Friuli’. A bastin lis datis par capî trop indevant cui timps che al jere Gentilli: prime ancjemò di Petracco e prime dal taramot…
Il libri al à une prefazion di Furio Honsell, cuant che al jere ancjemò retôr de universitât furlane, e une biografiche par cure di Granfranco Ellero. Cun di plui, Geremia Gomboso al spieghe cun precision (par furlan) la motivazion de publicazion, cence mancjâ di domandâsi cemût mai che il non di Gentilli al vedi riscjât di lâ in dismentie (nol è citât nancje in publicazions che a tratin de storie de universitât furlane…).
Il volum numar 12 al fâs cognossi une altre figure di autonomist une vore ferbint, Faustino Barbina (nassût a Mortean intal 1900, e muart intal 1982), deputât e president de provincie di Udin e simpri impegnât in incjariis variis de politiche.
G. Ellero e G. Gomboso, inte prefazion (scrite par furlan), a fasin une osservazion une vore fine, fevelant dal daspò vuere. Lis ideologjiis in chê volte a jerin fuartis, ma ancje i oms che lis rapresentavin a jerin oms di un ciert nivel: Tessitori, Barbina, Gortani di une bande, Lizzero, Pellegrini, Scocimarro di chê altre. Invezit in dì di vuê…
Gianfranco D’Aronco che al è il curadôr, al spieghe in ce maniere che al è nassût chest  libri. E no si po fâ di mancul di amirâ la sô precision e la ricjece dal so archivi che al à di sei une vore grant e, plui di dut, une vore ben ordenât…
I articui a vignirin fûr su gjornâi locâi (Gazzettino, Messaggero, e v.i.) e a rivuardin dutis lis cuistions de autonomie.
Simpri lucit e fin, Barbina, come intal prin dai articui, dulà che al fâs une analisi precise e meticolose de situazion economiche dal Friûl a pene jessût de vuere, fasint ancje cualchi ipotesi sui investiments che a coventavin par sperâ di tornâ a tirâlu sù. E po al seguite la storie za cognossude des vicendis che a puartarin ae nassite di cheste sorte di regjon: comissions e sotcomissions …vâl a dî la maniere miôr par no risolvi un probleme (lu diseve bielzà Marx…). Cul risultât di un Friûl dipendent di Triest. Storie za contade, par altri, intal libri di D’Aronco, Friuli, regione mai nata. Barbina al viodè ben chel che al sarès sucedût: “Al è dut clar e sempliç (…) unitât e vûl dî triestinitât e nuie altri. E cussì, preparìnsi a celebrâ il decenâl de anession dal Friûl a Triest”.
Cjampanilisim? Acuse cussì facile di tirâ! Ma a tirâle a son scuasi simpri chei che il lôr cjampanili lu àn ben strent intes mans e no lu molin. E a critichin chei puarins che si ingrimpin al lôr che al è daûr a sbalotâ intes ondis di un mâr in tampieste!
Di grande valence umane, par finî, la testemoneance de esperience di Barbina intal cjamp di Dachau.
Doi biei libruts, interessants e ben fats. Ce vê di plui?
Zuan Laurin Nardin
________________________________
San Simon: nissun vincidôr
Inte edizion numar 29 dal storic premi leterari in lenghe furlane «Sant Simon», chest an nissun al à vinçût. Fra lis cinc oparis presentadis, mancul de metât dal an passât, la jurie no à ritignût che a ‘nd fos une buine par jessi vincidore. Une di chestis però e je stade segnalade e duncje e sarà publicade: “Contis di un di Torse” di Paolo Monte di Rizzolo di Reane: un afresc di un paîs.
Fra lis oparis nissun romanç presentât, nome racuelte di contis che, come che si diseve, la zurie e à judicât debulis dal pont di viste de lenghe, de grafie, de forme. Pal San Simonut, il premi leterari riservât aes scuelis mezanis, prins a pari merit lis 3°C e D de Bianchi di Codroip (an scolastic 2007/2008) cun «Olmis furlanis», e la 3°A e B de scuele mezane Destra Torre di Dael cun “La bataice di Crauì”.
Redazion