I PROTAGONISCJ – Al è stât in confidence cun trê imperadôrs

Popon, patriarcje di Aquilee dal 1019 ae sô muart, tal 1042, al jere de nobile gjernazie bavarese dai Otakar. Il so non al è ancjemò vîf par vê tornât a tirâ sù la magnifiche basiliche di Aquilee, consacrade ai 13 di Lui dal 1031 e il tor maestôs. Ma Popon, tai siei 23 agns di guvier, al metè dute la sô braùre soredut par fâ incressi il podê dal patriarcjât. Al fo in confidence cui imperadôrs Indrì II di Sassonie, Corât II il Salic di Franconie e cun so fi Indrì III, e par lôr al scombatè par lunc e par traviers, te Gjermanie e te penisule taliane. Stant che si jere metût cul imperi, al rivà a fâsi concedi tieris e dirits a pro dal patriarcjât: une selve imense dal Lusinç ae Livence (dopo slargjade fin ae Plâf), tieris in Carinzie e tal Cragn, imunitâts e esenzion di gabelis, e fintremai il dirit di bati  monede. Pal rilanç di Aquilee al implantà il cjapitul catedrâl cun 50 cjalunis cuntune vore di renditis, al tirà sù il munistîr potent des benedetinis, il grant palaç patriarcjâl, il puart, lis muris. Popon al è stimât tant che il prelât european plui potent di chei secui de Ete di Mieç. Forsit no saran ducj merits siei, ma il so guvier al à vude une impuartance fondamentâl pe afermazion dal podê ancje civîl dal patriarcjât. Cence jessi considerât il fondadôr dal principât eclesiastic di Aquilee, dal sigûr Popon al à vierte la strade ae invistidure formâl dal Friûl a Siart, ai 3 di Avrîl dal 1077.
◆ Ve achì un toc dal privilegium dulà che Popon, in ocasion de consacrazion de gnove basiliche di Aquilee ai 13 di Lui dal 1031, al done al Cjapitul di cincuante cjalunis il cuartês, il dirit di judicâ e ducj i dirits des vilis di Merêt (di Cjapitul), Menarûl, Palmade, Roncjis di Palmade, Roncjetis, S. Lurinç di Sotselve, Ontagnan, Feletis, Bicinins, S. Stiefin, Clauian, Cjasteons di Strade, Morsan, S. Andrât e Gonârs. Dopo, al zonte: “Ancje la vile di Maran, la vile di Cjarlins e chê di S. Zorç, cun ducj i lôr redits, cui siei confins e tieris, cui cjamps, vignis, prâts, pascs, coltâts e pustots, cu lis aghis, chês di navigâ e chês pai mulins, lis isulis, dal mâr e dal flum clamât Cuar fin ae roie clamade Arvoncli (Turgnan), cui palûts, lis vals di pescje, cui boscs e lis bestiis di cjaçâ…” ❚