La vôs blancje di Giulia Daici tal so gnûf album

A  distance di plui di siet agns dal so ultin lavôr, che al jere stât Tal cîl des Acuilis, Giulia Daici e à publicât il so gnûf disc: Ancora Bianca.
◆ «…come nêf o ven jù ancjemò blancje sore dal pantan…» chest lavôr al à voie di jessi, come che e conte Giulia, «un auguri che jo stesse o fâs ae mê anime, ven a stâi che e resti simpri “pure” a dispiet di dut il “pantan” che o pues cjatâ».
◆ Il disc, che al cjape dentri dîs tocs par talian componûts tra il 2012 e il 2016, al è stât presentât in conciert juste prin de crisi dal Covid tal paîs di Giulia, Dartigne. Cheste presentazion e je stade une fieste plene di musiche, danze e emozion, dulà che «il public al veve i voi lustris e jo o soi tornade a cjase pardabon cul cûr plen di gjonde!».
◆ Intal disc, produsût dal om Simone Rizzi, a àn sunât ancje Paolo Muscovi, ae baterie, e Aldo Daici, il papà di Giulia, al flicorno baritono. Lis cjançons autobiografichis a lassin spazi a dialics profonts cun se stesse, ai ricuarts di cui che nol è plui (come i amîs a cuatri çatis), a moments particolârs di catarsi, ae ricercje e ae necessitât de preiere e al so jessi deventade mame.
◆ Nancje fâlu a pueste, a Fevrâr Giulia e à zirât il video di Respirare (in fondo è semplice), seste cjançon dal disc. Il video al somee presagjî ce che al sarès sucedût pôc dopo, cu la pandemie. «Vôs, anime e cuarp che si fondin insiemi e si sintin part dal dut. A cjatin in ogni moment de lôr esistence la fuarce e la capacitât di “respirâ”, ancje cuant lis circostancis a somein dineâ ancje la facoltât dal respîr (no tant sul plan fisic ma su chel spirituâl)». Il video al è stât publicat ai 4 di Mai cul auguri che si puedi pardabon di chi indenant tornâ a “respirâ” ad implen.
◆ Stait daûr a Giulia Daici su lis plateformis social, come Facebook e Youtube, par scuvierzi insiemi a jê altris cjançons, videos e ducj i siei progjets.
◆ Ancora Bianca si cjate tai negoziis digjitâi principâi, su www.giuliadaici.com e tal cd fisic.  ❚