Plinio Clabassi, il bas dal Friûl a cent agns de nassite

Tai aniversaris de musiche furlane, chest an al cole il centenari de nassite di Plinio Clabassi, il grant bas furlan, nassût a Grediscje di Sedean e muart tal 1984 a San Vît dal Tiliment. Un bas, inte tiessidure de vôs, ma un omenon alt cuasi doi metris e che nol à vût vite facile, pai timps complicâts massime te ete de sô zoventût. Tal ’40 al jere arlêf uficiâl tal Reziment di fantarie a Palermo, mandât in vuere sul front grêc e albanês come sottenent, intune situazion dificile e riscjose che i è costade il conzelament dai pîs tal Galic, tant di riscjâ la amputazion che po, par fortune, al à rivât a evitâ. Une vite no facile ancje tal rientri in patrie che, cuant che al è lât a cjatâ la mari che lu crodeve muart, e je stade jê a murî di infart tal moment che lu à viodût e abraçât. Un traume chest, che lu compagnarà par dute la vite. Lât a Rome, al à ricjapade in man la sô passion pe musiche – lui che za al veve studiât di frut e direzût la Corâl di Grediscje prime di partî militâr – studiant inte capitâl taliane cul mestri Mario Cusmich. Daspò de aventure in Grecie e Albanie, al à fat la Resistence, e al è arestât dai fassiscj e tratât in maniere disumane intes galariis des SS. Daspò, cu la jentrade dai aleâts, al è stât salvât, ma al jere parât mâl, sec, stuart, di meretâsi la invaliditât di vuere e la medaie al valôr militâr. A chel pont, al à dât dut se stes ae musiche e al cjant, cun primis aparizions par concierts benefics, fin che tal ’46 al à partecipât al concors di cjant “Il Vivaio” – promovût de Eiar (la vecje Rai) – e lu à vinçût, tacant cussì une cariere che lu à puartât in dute Italie e tal forest, Australie, Gnove Zelande, Ingletiere. Une tournée che e je lade indenant fin tal ’49, par un totâl di 437 rapresentazions di oparis dal patrimoni talian tant che “Tosca”, “Aida”, “Traviata”, “Trovatore”, “Boheme”. Une vôs rafinade, la sô, rare e dal timbri speciâl, che graciis a chê a son vignudis daspò altris colaborazions e contrats ancje cu la Rai, indulà che al restarà fin tal ’75. Tra lis curiositâts e je la nomine a comendatôr de imperadore dal Gjapon, Mikiko, intant di un conciert pes vitimis di Hiroshima e Nagasaki. Tal ’70 al jere tornât a Grediscje di Sedean e dispès al cjantave ator pal Friûl. Tal ’83 si jere maridât cun Gianna Cuberli, par une storie di amôr fuarte ma purtrop curte. Di fat, ai 22 di Otubar dal 1984, il grant bas al mûr. Plinio Clabassi, intune cariere intense e stimade, al à cjantât in tancj templis de liriche, come al San Carlo di Napoli, a La Scala di Milan, cun cjantants di fame mondiâl tant che Maria Callas, Renata Tebaldi, Beniamino Gigli e tancj altris. Tancj materiâi e variis testemoneancis de sô lungje cariere a son conservâts tal paîs di nassite par cure de associazion “Amici del teatro Plinio Clabassi”. ❚ (A.S.)