Lis aziendis nostranis a son chês che a nivel talian si metin di plui in rêt
Al va indenant a cressi il numar des Rêts di imprese in Friûl e in Italie, e chel des impresis agriculis che si zontin. Lu à evidenziât une indagjin dal Centri Studis de Confagriculture che al conferme une cressite, tal 2019, dal 15% intal numar di chestis gnovis realtâts e dal 8% des aziendis cjapadis dentri. In tiermins numerics, si fevele in dut di 6.855 impresis su cuasi 35.000 a nivel talian.
◆ Tal an cjapât in considerazion, lis regjons là che al è stât il disvilup plui penç a son stadis la Val di Aoste (+68,8%), la Ligurie e il Piemont (+19,8% e + 19,2%), e po Trentin Sudtirôl, Basilicade, Calabrie e Friûl-VJ, dutis cressudis plui dal 15%.
Se o fevelìn in crût di numars, lis aziendis furlanis in rêt a son aromai 1.640, e a garantissin ae regjon il podi in Italie, ancje se sul scjalin plui bas. Il Friûl-VJ al è tierç in classifiche cun 800 aziendis in rêt: 746 (o ben il 93% e passe) tal setôr des coltivazions e dal arlevament; 45 tal boscâ e 8 tal arlevament di pes o di animâi di aghe. Seconde regjon e je il Lazi, cun 905 aziendis, e la Campanie e je al prin puest cun 1.003. Fûr dal podi, al cuart puest, juste dopo di nô, e je la Toscane cun 682.
◆ Lis Rêts che a cjapin dentri impresis agriculis a lavorin soredut te suaze des organizazions associativis, de direzion e de consulence aziendâl, dal cumierç ad in grues.
Se si confronte il numar di unitâts produtivis colegadis in Rêt cul totâl des impresis, il dât plui biel che si cjate ta chest scrutini al è che i imprenditôrs furlans a son chei che di un biel toc a son i plui disponibii ae colaborazion: i numars a fevelin di une medie di 161 impresis in rêt ogni 10mil, rispiet a un dât talian di 57,3 e, al contrari di ce che a pandin cierts lûcs comuns, a mostrin une fuarte vocazion a colaborâ.
◆ Decidêt voaltris se e je une intuizion o se e je dome Sante Scugne. Dut câs il dât di fat al è che lis Rêts di impresis, dopo di un esordi timit (a jerin dome 75 in Friûl tal 2012), si pandin tant che imprescj une vore valits par rispuindi aes esigjencis di meti dongje compet
