AUSTRIE. Sisteme sanitari dut di tornâ a viodi

Stant a chel che a disin i sorestants de categorie dai miedis, soredut pe dade di timp che e leve dal 1995 al 2001, la Austrie e vivè il pericul di une invasion di miedis. Dopo mancul di vincj agns, tant che al pant il lôr ordin e che al è stât fat bon dai media, la situazion si è savoltade e al somee che la mancjance di miedis e sedi il plui grant fastidi dal sisteme sanitari austriac.
A prin viodi e somee une contradizion, ma nol è cussì. Cun di fat, a son ben problemis a cjatâ miedis di meti intai ospedâi, ma no par vie che a sedin pôcs, ma ben parcè che a son cetancj impleâts intes mutuis e in dut il sisteme sanitari. Viodint cussì la cuistion, bisugnarà cirî la soluzion in mût dal dut diferent che se a fossin pôcs. Dome par fâ cualchi cont, il numar dai miedis in Austrie al è incressût dibot dal 250% dai agns ’70 incà, massime intai ospedâi, là che la percentuâl si alce al 300%. Ben clâr che bisugne tignî cont de incressite demografiche e de etât anagrafiche, e inalore si pues dî che l’aument vêr al è stât dal 28%. Tal ultin, la Austrie e à sù par jù 5 miedis par ogni 1000 abitants, là che la medie europeane a ‘nt conte 3,7. Dut câs, salacor par vie di ponts debii inte organizazion e inte struture, no si cjatin cun comut miedis par sostituî chei che a mancjin o che a van vie.
L’ordin dai miedis al volarès incressi il numar di chei disponibii, indreçantsi sui vantaçs di onorari e su lis cundizions di lavôr par tirâ dongje plui miedis intal sisteme des mutuis e intai ospedâi. Dut chest al riscje di jessi falât, se no si invie un mudament inte organizazion e intes struturis sanitariis, di mût di fa calâ il numar dai miedis che a coventin al sisteme, cence – ben clâr – ridusi la cualitât dal servizi.
La discussion, ancje a nivel politic, e trate sui obietîfs e su cuâi mieçs che a son di doprâ par rivâ adore a otignîju.
Il plui impuartant al è cence fal chel di rivâ a vê mancul pazients e plui int sane, par vie che la Austrie, in dute la Europe, e à il plui alt numar di visitis in ambulatori e dîs di ricovar in ospedâl in proporzion ai abitants. Al somee cun di fat che la int no vedi masse a cûr la prevenzion, ma ancje la informazion e la competence a nivel sanitari: a saressin propit chescj i prins cantins dulà meti man subit par sbassâ il numar di chei che si metin par dibant tes mans dal sisteme sanitari.
Jenfri lis justaduris proferidis, o nomenìn chê di meti in vore il model PHC (Primary Health Care), ven a stâi la assistence sanitarie di fonde, stiçant i miedis di base a indreçâ in mût adat e sensât i pazients, par garantî curis une vore cualificadis, e duncje valevulis, su la fonde di dibisugnis veris. Si trate, in fin dai fats, di stratignîsi di prescrizions inutilis fasint sparagnâ bêçs e int al sisteme.
Dongje di chest, il sisteme sanitari al va tornât a viodi di plante fûr, scomençant di ducj i infermîrs, che la lôr percentuâl par abitant e je invezit une des plui bassis inte Union Europeane. Si larà indevant daspò metint man a dut il sisteme dai miedis di base, che dispès, dongje di fâ i “miedis de mutue”, a lavorin ancje in profession libare, e cussì dut il sisteme al risint. Par prionte, i miedis a fasin ancje voris che a podaressin jessi puartadis indevant di altris di lôr, tant che infermîrs specializâts (par medeâ piçulis feridis, fassâ, cambiâ jutoris acustics e vie indevant), cence fevelâ di ducj i assums burocratics che a podaressin jessi davuelts di impleâts aministratîfs.
Si che duncje, mancul miedis, ma plui specializâts e plui centrâts sul lôr vêr mistîr. ❚
Barbara Cinausero