Ermes di Colloredo, Poesie scelte, Udine 1992

«Chiante il vilan, e in fetis va tajant / Lu dur teren cui braz e cul versor; / E se ben scalmanat, plen di sudor, / la gran fadìe plaseul rind cul so chiant. / / Chiante la vilanele il sorc sapant / Cul chiaf jù bass, e alt lu posterior / E par che disi a Sirio: il to brusor / Che al mi teti di maj, piez di furfant / / (…) Chianti anchie jò par slizerì il torment, / Che lontan di Polimie ogn’ore ‘o sint: / Polimie di chest cuur unic content».

Al è il prin sunet che o cjatìn in cheste edizion des poesiis dal cont Ermes, vivût jenfri il 1622 e il 1692. Al fo militâr e diplomatic, ma la sô vere nature e jere di poete e, cun di fat, a pene che al podè, si ritirà inte sô vile di Guriz di Cjamin dal Tiliment, fin ae muart.

Lis sôs poesiis furlanis a son un document interessant sedi pal lôr valôr leterari (cualchidune des composizions e je cence mancul di alt nivel) sedi pe testemoneance dal stât de lenghe furlane intal Sîscent e des soluzions dopradis pe grafie.

A forin editadis une prime volte intal 1785 par cure dai fradis Murero di Vignesie. Po, intal 1828, al fo Pieri Çorut a publicâ lis poesiis dal Colorêt, cu la zonte di une cuindisine des sôs. E, intal 1992, la Societât Filologjiche Furlane e de fûr chescj doi volums intun elegant satûl, cuntune prefazion critiche une vore documentade di Rienzo Pellegrini.

A son, pe plui part, sunets, ma ancje otavis, dialics, odis e cjançons une vore lungjis. I argoments a son chei che si pues spietâsi de poesie di chel periodi: la nature, cronichis di vuere, lis amiciziis, lis malatiis. E, plui di dut, l’amôr pe sô Polimie, li che, cualchi volte, il so cjant al à une ande che e fâs pensâ al Petrarca e ai siei amôrs disfortunâts. No mancje, però, nancje la vene satiriche e la voie di scherçâ. La scriture e rispiete metriche e prosodie, tant al è vêr che cualchidune des cjançons e je ancje stade metude in musiche (di Lino Straulino).

Opare meritorie cheste edizion, che e met ae puartade dai furlans un dai paris de lôr lenghe.

Laurin Zuan Nardin