Inte sô vicende umane di om e di predi, pre Antoni al à sperimentade simpri la man di Diu che lu compagnave. Tes dificoltâts al à simpri cjatade la maniere di saltâ fûr e di fâ tesaur de esperience ancje negative tal seminari, tai prins agns di capelan a Codroip, te sielte riscjose di lâ a finîle sù in Cjargne. Lant indenant te vite al à viodût che ce che al podeve fruçâlu, lu à infuartît in sapience, interioritât, libertât, passion evangjeliche: une ricjece pe glesie e pal popul. (pre Roman Michelot)
Il seminari e i prins agns di predi
No stoi a dî, ancje parcè che lu ai za dit, ce che mi à costât il seminari e la sô vite struturade. Dut al jere cuintri di me e i superiôrs, a partî dal retôr Fantin, no viodevin o no volevin viodi nissun segnâl di vocazion. La situazion e jere disperade. O ai cjatât il pari spirituâl, Perissut, che mi à simpri dit di lâ indenant e di meti dut tes mans di Diu. La nestre classe e jere viodude di trist voli… Chê che e veve di jessi la nestre disgracie si è tramudade in fortune. Jessint sui paradôrs de struture, si sin unîts inmò di plui fra di nô e o vin scuviertis dôs fontanis di aghe pure: la musiche e la culture furlane e slovene. O vin cognossût e praticât i tocs plui biei de musiche sacre nostrane, robe che i zovins di vuê nancje no si insumiin, e o vin scuviert il filon de lenghe e de culture. Nissune classe ni prime di nô ni dopo di nô si è metude in lûs par une sensibilitât e passion cussì grande pal nestri patrimoni linguistic e culturâl. Ancje cheste e je provedence. Personalmentri, no jessint puartât pal zûc, mi tiravi in bande a lei e a sgripiâ cul armonium e o ai imparade la musiche, che mi da sodisfazions simpri gnovis e mi permet di trasmeti a la mê comunitât chest autentic don di Diu. Di fat, lis nestris messis a àn un alc di particolâr, di cjalt, di legri.
Tornant indaûr ai agns lontans des mês primiziis sacerdotâls, o scuen dî che ancje li si è palesade la misericordie di Diu. I trê agns di Codroip a son stâts agns impegnatîfs ma disordenâts. Masse cori a vueit, masse impegns scoordenâts, masse disorganizazion, masse distac fra la gjestion manageriâl dal bonsignôr e la pastorâl di ogni dì, che nus tocjave a nô. In cussì pôc timp o ai rivât a fâmi istès tantis amiciziis, che a durin a distance di cuarante agns e duncje a son colaudadis. Po al à tacât a slacâ dut, almancul par me. Il plevan al è partît par Udin, par fâ cariere; Copolut al è rivât di Udin parcè che lu vevin scorsât e al smicjave a rifâsi a Codroip cu la sô fantasie discjadenade; la salût che e scomençave za a dâmi cualchi segnâl preocupant. Mi soi inacuart che no leve e no viodevi soluzions di sorte, anzit o sintivi che la robe e precipitave. Mi soi salvât scjampant su lis monts, come che al racomande il vanzeli. Di une des primis parochiis dal Friûl, cun prospetive sigure di cariere a une des ultimis de Cjargne, cu la sigurece di cjatâmi suntun binari muart. A 27 agns! Une sielte incomprensibile, azardade, pericolose, un colp di cjâf. Là sù, fûr de confusion, framieç di une int gjenuine e afetuose, cun tant timp par pensâ, a contat seguitîf e vitâl cul mont naturâl, cu lis stagjons dal an e de vite, te semplicitât e te essenzialitât de int inlidrisade te sô tiere e te sô culture, cun virtûts e difiets, o ai vût mût di tornâ a rifleti, a riviodi, a ricalibrâ la mê vite, lis mês ideis, la mê scjale di valôrs, il sens dal gno jessi om e predi, il gust e il cost de libertât. Là che o varès vût di murî, tant psicologjichementri che culturalmentri che, come che a vevin teme in curie, spiritualmentri, o soi tornât a nassi da la aghe e dal Spiritussant. A dibot cuarante agns di distance di cheste mê autentiche conversion, colaudade cul timp e cu lis provis e lis sfidis de vite, o dîs che e je stade la man di Diu a compagnâmi sot de Tersadie, te plêf di Sant Martin di Rualp e Val e di Sant Zuan di Treli, là che, al contrari de fie di Jefte, no ai vaiude ni pierdude la mê zoventût e vergjinitât, ma le ai recuperade cui interès.
di pre Anton Beline
