SIMPRI BOGNS. Stiefin Morat, “Kebar Krossé”, Udin 2016

«Ben, chel lunis al ere començât come une plante di pantan, se i veis presinte la cuistion. Un lunis di matine che tu cjaminis par Marcjât Vieri e che ti rive intor il tuf strac des andronis di dulà che -a contavin – une volte a erin vetrinis di boteghis. Un tip magri e spelât, cuntun gaban neri lunc fin tai peits, al scovave tocs di crep che si distacavin dal volt dai puartins».
Di leture no facilissime chest secont romanç di Stiefin (daspò dal famôs Donald dal Tiliment), almancul par cui che al à une formazion leterarie tradizionâl.
“I libris a son peraulis. Peraulis lis domandis e peraulis ancje lis rispuestis. Vivi, invezit, al è tambûr” (p. 59). Il mont che al descrîf Morat al è lât parfin plui lontan di Fahrenheit 451: culì i libris no ju brusin, no àn nancje bisugne di brusâju. Dal supuart di cjarte a son passâts a chel eletronic, ma il fat al è che nissun ju cîr, i libris, a nissun no i interessin, par vie che nissun al fâs plui domandis. A vegnin i sgrisui a pensâ a di un mont fat cussì: lis ostariis si clamin primarolis, lis bibitis (bevarons chimics) no àn nancje un non ma dome numars, la ocupazion di un lavoradôr e pues jessi chê di cracâ vues o ben di catalogâ ongulis, dut al è regolât cun protocoi e acronims intune citât (Udin, ancje se no je mai nomenade) sierade in se, che e viôt passâ i ‘trains’ bande sud (e cuissà dulà che a van…) e che inte sô cengle NE (nord-est) e à ingrumâts ducj chei di categorie inferiôr, che a pucin e che a furnissin braçs pes bassis produzions.
Al ven di domandâsi trop lontane de realtât di vuê che e je une situazion parele. E il fat che dut chest al sedi contât intune lenghe furlane inovative i da ancjemò plui pregnance al discors. I puriscj a stuarzaran il nâs, ma e je inceose cheste scriture che si môf su trê nivei, trê regjistris diferents: la koinè, il furlan ocidentâl (magari un pôc sfuarçât) e il ‘lanfur’. Ce isal il lanfur? Provait a dividi la peraule in doi e, daspò, a invertî i doi tocs: lan-fur = fur-lan.
Operazion che a fasin benzà i francês intes perifariis des grandis citâts. E il tiermin ‘lan-fur’ al capite, in dì di vuê, di sintîlu su la bocje di cualchi triestin… Cheste lenghe imbastardide no sarà mighe un altri segnâl che alc di brut al è daûr a sucedi in Friûl (come che al dîs Donato Toffoli inte postfazion)?
Une des leçs che a dissiplinin il tratament e il cumierç di prodots potenzialmentri tossics inte Udin dal avignî, e puarte il numar 482/99…
LAURIN ZUAN NARDIN