SLOVENIE. A coventin riformis par sisteme sanitari sloven. I numars e lis prospetivis

E je une Sierade travaiade chê dal sisteme sanitari public sloven, che di tancj agns aromai al spiete une riforme struturâl. Cheste e je stade definide tant che une des prioritâts dal guvier vuidât di Miro Cerar, che al à cjapât in man lis brenis dal paîs ai 18 di Setembar dal 2014. I problemis de sanitât publiche slovene, pal moment, a restin ancjemò cence soluzion, e al è stât anunziât un siopar dai miedis; cun di plui al è sclopât un câs gnûf impuartant di coruzion. In cualchi struture sanitarie a varessin cjapât bêçs par fâ scjavalgjâ lis listis di spiete.
A son propit lis listis interminabilis di spiete un dai problemis plui grancj (e plui sintûts da citadins) de sanitât publiche slovene. Intai ultins trê agns, su la base dai dâts (incomplets parcè che no cjapin dentri dutis lis struturis e ducj i servizis o prestazions ufierts) dal Istitût pe assicurazion sanitarie slovene: il numar dai pazients in spiete e je cressût dal 31%. A son plui di 216 mil lis personis che a spietin di vê la prestazion domandade. Tra chescj cuasi 40 mil a son in liste di spiete par un timp “intolerabil” o adiriture “lunc in maniere ilegâl”. L’Istitût al à calcolât che par rivâ a eliminâ i timps di spiete al varès bisugne di 120 milions di euros di plui ogni an, par eliminâ dome chei “inamissibii” a coventaressin invezit 24 milions di euros par an di plui. Intant, l’Istitût al à decidût, tal belanç di prevision pal an che al ven, di invistî fonts zontâts, cuasi 11 milions di euros, pal abatiment dai timps di spiete. A son previodudis misuris speciâls ancje de bande dal Ministeri de salût sloven, vuidât di Milojka Kolar Celarc. Il ministri, di timp aromai al centri di tantis critichis, no dome di bande de oposizion, al à passât a metât Otubar la mozion di sfiducie in Parlament, ma al à vût tal stes timp un ultimatum dal partît di coalizion DeSUS, ai 12 di Dicembar, par preparâ la gnove leç su la assistence sanitarie e su la assicurazion sanitarie (e je in fase di preparazion). In câs contrari a domandaran la rimozion dal ministri.
Secont il ministri la sanitât publiche slovene e à di jessi juste e solidarie. Il sisteme sanitari, li che i problemis si son moltiplicâts intai ultins 15-20 agns, al à bisugne di jessi rimodernât e rinovât, e al à di jessi fondât su di un pachet di prestazions e servizis universâi che a àn di jessi compagns par siôrs e puars. Cun di plui, e à di jessi garantide la sô sostignibilitât a lunc tiermin. Intant al à otignût che intai prossims doi agns i fonts a disposizion pe sanitât slovene a vignissin cressûts di plui o mancul 100 milions di euros e nol è escludût che a vegnin destinâts dai fonts zontâts dal belanç propit cul obietîf di ridusi i timps di spiete. In cualchi istitût sanitari a son daûr a fâ progjets pilote par une gjestion plui eficiente des listis di spiete e a Novembar e varès di jessi presentade la propueste di modificazion de leç sui dirits dal malât par butâ jù i timps di spiete. E je stade za presentade invezit la propueste di leç su la ativitât farmaceutiche che no à sodisfat ducj dentri de coalizion di guvier, ma che e gjolt de poie de Cjamare farmaceutiche. Il ministri al à metût in evidence la adozion dal plan strategjic nazionâl pe assistence sanitarie 2015-2025 e une analisi atente dal sisteme sanitari sloven, documents base pe preparazion de riforme struturâl dal sisteme.
O citìn ancjemò cualchi dât par une comparazion internazionâl dal sisteme sanitari sloven: daûr dai dâts de OCSE, la percentuâl dal Pil che la Slovenie e invistìs inte sanitât e rive ae 8,7% (la medie Ocse al è de 8,9%); pe Comission europeane la eficience dal sisteme sanitari sloven al è al 20im puest, disot de medie inte Union europeane (EU28); il Forum economic internazionâl, invezit, al met la Slovenie al 15im puest tra 140 Paîs pe cualitât dal servizi sanitari, l’Istitût Legatum al 27im tra 142 paîs, l’ Ocse al 24im tra 36 paîs. ❚
Tjaša Gruden