Une sconfite par Vignesie îr, une vitorie pal Friûl vuê

Mi plasarès vierzi la pirule di storie di chest numar cun cheste domande: Gurize aie viodût sparî la prospetive di jentrâ tai dominis venezians? Jo o rispuindarès: cu la Vuere di Gardiscje, tal principi dal Sîscent. Al pues vê un ciert significât par nô furlans, ma pai talians e je une “vuere cuasi dismenteade”, come che al à scrit Giuseppe Trebbi presentant il lavôr di Riccardo Caimmi.
◆ E cemût podevie jessi se no cussì? Agns lûs lontane des maraveosis vitoriis venezianis dal Rinassiment, par une vore di timp statiche, fadiose, cence grandis bataiis di cjamp, e za logade al inizi dal lunc periodi di declin militâr e economic de Serenissime, al pont che, dopo dal enesim assalt falît cuintri di Gardiscje, si scomençave a dî che “Vignesie no je di vuere”. L’unic motîf par che un talian al podarès vê sintût fevelâ di chest cjapitul di storie, al è la someance gjeografiche impuartante fra i teatris de vuere dongje il Lusinç di chest conflit e chei de Grande Vuere.
◆ Ancje se e fo une grande delusion no jessi rivade a tornâ a cjapâ Gardiscje, cussì come par no vê podût regolâ il confin complès cui Asburcs, Vignesie e rivà a confermâ la sô dominance sul Adriatic. In sumis, e fo une mieze vitorie pal “leon alât”; e chê metât no tocjave il Friûl orientâl, che cussì al jentrà tal periodi plui prospar dai Asburcs.
◆ Dilunc dai secui XVII e XVIII a forin “disfornâts” diviers esemplis di architeture di alte cualitât, che a saressin stâts fondamentâi par definî un spirt locâl, distint di chel che si cjate a Udin o a Pordenon. Chescj a cjapin dentri la emblematiche Glesie jesuite di Sant Ignazi, cul so stîl baroc caraterizât des sôs tipichis cupulis a cevole, o i Palaçs Attems-Santa Croce e Attems-Petzenstein, ducj i doi progjetâts dal architet di divignince gurizane Nicolò Pacassi, che al lavorà ancje al Palaç Schönbrunn a Viene. A Gardiscje, il Teatri Comunâl al è un altri esempli che si pues citâ.
◆ Dut câs, la vicinance cu la Republiche no podeve mancjâ di vê consecuencis. Ce che si inlidrisà a Gurize al fo un fenomen di osmosi culturâl: no dome, come dit parsore, il disvilup di un stîl asburgjic dentri di un teritori pe plui part venezian (il Friûl), ma ancje une conession e une influence artistiche mutuâl. Gurize, la sô Contee e il Friûl a vevin duncje un rûl fondamentâl di puint jenfri Viene e Vignesie; un rûl che al è stât ben evidenziât de mostre Pitôrs dal Sietcent jenfri Vignesie e l’Imperi, davuelte tal 2023 e tal 2024, no par câs, in doi spazis separâts e contemporanis: a Udin tal Cjistiel, e a Gurize tal Palaç Attems-Petzenstein.
◆ Ce che al fo une sconfite politiche e militâr pai nestris sorestants, vuê, par nô furlans, al à cjapât la forme di une vitorie culturâl, o pluitost, di un vuadagn culturâl. Mantignint dôs entitâts statâls cussì ilustris dentri di une regjon piçule, e je stade gjenerade une ricjece e une diversitât che iniziativis come GO!2025 a varessin di savê valorizâ.❚