Ai 6 di Avrîl a Teôr la prime Adunade dai Furlans
Il furlan si fevele ancjemò intal 44% des fameis. Al ten bot in Cjargne (70%) e a Glemone (57%), dulà che dut câs al è daûr a calâ, ma des bandis di San Denêl (48%), Codroip (45%), Udin (40%) e Tisane (32%) si sbasse simpri di plui inte percentuâl di chei che a declarin di cjacarâlu. A son chescj i gnûfs risultâts de “Fotografie linguistiche”, un scandai che si fâs ogni an in gracie dal lavôr apassionât ma sientific dai docents de “Lavagne Plurilengâl”. Passe 1800 students a àn partecipât a chest scrutini che al met a tamês lis lenghis che si fevelin tes scuelis secondariis di secont grât de ex provincie di Udin, e i dâts a judin a rindisi cont des dinamichis che si àn di frontâ soredut cuant che i fantats a jessin de scuele elementâr e medie e a rivin aes superiôrs. Se passe doi gjenitôrs su trê a sielzin di insegnâ il furlan ai fîs intal prin cicli, e intal zîr di pôcs agns la competence par tancj si piert, al è di resonâ su ce fâ par puartâ in miôr cheste tignude.
◆ La autovalutazion dai fantats e dîs robis une vore interessantis: par esempli che la marilenghe le fevelin soredut cui paris (31%) e cui nonos (38%). Invezit lis maris (25%) e i amîs (20%) a judin di mancul a tignî cont dal furlan. A son nivei che a fasin capî parcè che a coventin misuris di tutele e di valorizazion fuarte par evitâ che il furlan al ledi bande une muart cidine intai prossims 10 o 20 agns: aromai dî che “la lenghe si à di fevelâ in famee” e je une afermazion vueide, parcè che cence une azion su plui plans la situazions in prospetive e riscje di deventâ ancjemò plui grivie.
◆ In spiete che lis decisions a nivel di politiche linguistiche a rivin a sburtâ simpri di plui par un ûs plui larc de lenghe, alc di biel si dismôf sul teren de identitât. O vin ricevude une biele gnove di Teôr, di fat il vicepresident de Pro Loco Massimiliano Ghiro nus à scrit in chel biel paîs sabide ai 6 di Avrîl si davuelzarà la Prime Adunade dai Furlans. Efiet – nus dîs – de leture di un editoriâl de “Patrie”, “leture iluminante tal sens vêr de peraule, no alegoric”, “buine di fâ lusôr par sclarî une idee che e esisteve bielzà”. “Al è di agns che o vevin tal cjâf di organizâ une fieste furlane – al spieghe Ghiro – e purtrop, sul plui biel, il taramot dal Covid e post Covid, nus à crevât lis pividis prontis a sflurî”. Dut câs cumò “i timps, par fortune, a son finalmentri (di gnûf) madûrs”.
◆ La “Adunade dai Furlans” e je “il titul perfet pe manifestazion, propit parcè che al va di là di un biel slogan, ma al puarte daûr di se un significât di agregazion e comunance tra personis che si sintin leadis par cualchi reson. La “Adunade” e volarès deventâ la ocasion par rinsaldâ i leams dai Furlans cu la lôr tiere di origjin e cu la lôr identitât. La sperance e je chê di meti jù lis fondis par une ricorence anuâl”.
◆ A Teôr a àn clâr l’obietîf, che “al è chel di coinvolzi in maniere trasversâl gjenerazions diviersis, dant inizi a un circul virtuôs che al podedi e al savedi inzornâsi ancje ta lis edizions futuris, soredut gracie al apuart di zovins e zovenons furlans.” Ghiro al va daûr di une massime di Lucrezi che al diseve che “l’om al po salvâsi dome midiant da la cognossince da lis robis e no dant il merit a intervents divins par chel che nol rive a capî”. Un “fasìn di bessôi” in sostance. Salacor plui liric, ma dut câs un “fasìn di bessôi”.
◆ “Su chest – al siere – o pensi che nô furlans o vedin une abilitât smisurade, che però dispès e ven frenade di nô stes. E sarès ore, duncje, che o rivassin a vê plui cussience dai nestris mieçs, e dome la cognossince de nestre storie, culture e lenghe nus podarà salvâ come popul. E alore, us spietìn ducj a Teôr”.
◆ Ce biel vê letôrs cussì! Fin che a son furlans di cheste fate, come che al diseve pre Checo Placerean, no si à di vê pôre di vê coragjo. ❚
