Un leam cu la musiche che al va indaûr fin ai timps di Aquilee (PRIME PART)

Fabula fertur: l’Homo furlanus nol à cuardis che a vibrin pe estetiche musicâl. La sô estetiche, se e ves di esisti, no rive a inmagâsi di nuie che nol sedi funzionâl ae finalitât pratiche dal vivi cuotidian. Il timp libar (ma esistial?), chel magari cussì no dedeât a imparâ un strument di soflâ, di bati o di piçâ, al ven simpri tornât invistî in dutis lis robis che a coventin par “puartâ indevant la barache”. Duncje, finide la vite ative e consumadis lis oris canonichis dal lavôr, no esist vite contemplative che e vali la pene tant che il messedâ malte, il justâ argagns, regolâ cuvierts, smontâ argagns, o pûr viodi dal ort di cjase. Cence contâ dut il rest: bruscjâ intal bosc, taiâ la jerbe dal prât, scovâ la strade devant de puarte di cjase, dedeâsi a cualchi passetimp ma simpri pratic, magari metint lis mans suntun motôr o tignî ben lustri e in funzion il laboratori dai imprescj. E cuant che al à finît tal so, al domande se mai cualchi amì al vedi bisugne di une man. Anzit, di dutis dôs.
◆ La veretât e je, come simpri, une vore lontane de liende. E merete il timp di une rubricute come cheste par contâle juste. E il materiâl al è cussì penç che nus tocje cjapâ dôs pontadis. O podaressin partî di lontan, par dimostrâ trop fuart che al è il leam fra i furlans e la musiche. Di Sant Jaroni, adiriture, che in visite inte citât di Aquilee, sintint cemût che a modulavin la vôs i cjantôrs de basiliche, al disè che considerazion cetant fortunade che chi in Friûl nus fâs braurôs in mût particolâr: “Clerici aquilegenses cantant sicuti chorus beatorum Romani baiulant sicut canes”; a dî che chi si cjante come agnui, a Rome si vuache tant che cjans. E al jere il secul IV de Ete volgâr.
◆ Studiôs impuartantons nus àn insegnât che dute la liturgjie di Aquilee e jere une vore preseade intal mont cristian e, in particolâr dentri tai confins de sô diocesi, che come che si sa e cjapave dentri un teritori grant e plurâl, de Ongjarie al lât di Como, cun buine part des glesiis des valadis de Drau e de Save. O vin di ringraciâ musicolics di innomine internazionâi tant che Pellegrino Ernetti (1925-1994), Giacomo Baroffio (1940), Gilberto Pressacco (1945-1997), se o podìn gjoldi ancjemò in dì di vuê di cheste tradizion maraveose, che e ven custodide e tramandade di manuscrits une vore impuartants, un timp conservâts inte Badie benedetine di Mueç.
◆ Un di chei si lu cjate ore presint inte Biblioteche Vuarneriane di San Denêl: al fo scrit su pergamenis di agnel prime dal an Mil, e la so vôs e cjante il Misteri de lungje gnot di Nadâl. La Ete di Mieç e je stade cetant siore di testemoneancis di cheste grande sensibilitât, che no jere un patrimoni dome tes mans dai Teolics e dal “predessam”, dal moment che la int e leve a messe e si lassave incantesemâ di dute chê bielece. Clâr, tes corts dai grancj feudataris e dai princips che a vivevin intai cjistiei de Patrie dal Friûl, il nivel de produzion al jere altissim.
◆ Si cjantave par todesc e par provençâl, e lis tematichis a jerin chês profanis dal amôr cortês, tant che in Provence, in France, in Bretagne o in Irlande, par no fevelâ di Magonze, o di Aquisgrane, di Parîs o di Londre. Se e je vere che adiriture il patriarcje Volchîr, ben za vescul di Passau (1191-1204) prime di sentâsi su la catidre in Aquilee (1204-1218), al ven identificât tant che l’autôr di tantis cjantis de racuelte dai Carmina Burana, no je nissune maravee che la sô cort a Cividât, come che dispès o vin memoreât, e fo un spazi privilegjât pal incuintri di musiciscj e di cjantôrs. Ma la tradizion dal cjant popolâr e jere fuarte compagn intai borcs rurâi, là che a rivavin lis caravanis dai musicants e dai torototelis. Purtrop no vin testemoneance di podê gjoldi, dal moment che la lôr e jere une tradizion orâl. Ma par fortune lis pituris e i frescs che a insiorin lis nestris glesiis, ancje chês plui piçulis pierdudis vie pe campagne, nus contin di une sapience inlidrisade ben: agnui e pastôrs a vegnin rapresentâts dispès intant che a son daûr a sunâ pivetis e pivis, tamburei e vielis, ribechis e dulcimer.
◆ Che i contadins a sunassin e che a balassin, facil al sun di une fulziche, al ven testemoneât des cronichis e des testemoneancis che a vegnin fûr dai nestris archivis, minieris di informazions preziosis, come chês che tantis voltis a sbrissin di sot dai dêts cuant che si consultin. Si conte di sunadôrs clamâts a meti ligrie intes fiestis dai sants patrons, in particolâr chel Macôr che adun cun Fortunât al rapresente un dai ponts di riferiment liturgjics de nestre tradizion plui antighe. Al fo il patriarcje Beltram a ripuartâ in ande il bal sul breâr, propit in ocasion di chê fieste, celebrade ai 12 di Jugn, vuê come ai siei timps. Un bal ancestrâl, siamanic, peât ai rituâi magjics in funzion dal cercli dal an agrari. Cualchi dì plui tart si celebrave ancje Sant Vît, facil intune maniere no masse diferente di chê che ancjemò e condure inte regjon salentine.
◆ Il grant Zorç Maineri (Parme, 1535 – Aquilee 1582), mestri di capele dal Patriarcje ma in odôr di eresie, al fo forsit un dai ultins testemonis di chescj rituâi, e par nestre fortune al à cjapade note de musiche, intal prin libri che o podaressin definî di etnomusicologjie di dute la Europe, il famôs “Primo libro de’ balli” stampât a Vignesie intal 1578. I tocs ripuartâts, metûts in paragon cun altris documents ancje plui tarts peâts al tribunâl de Sante (?) Incuisizion, nus contin di une civiltât contadine che e crodeve inte magjie, e intal fat che lis dimensions che si incrosin cu la nestre vite a son tantis di plui di chês che o crodìn: il mont dai vîfs e chel dai muarts, l’Uman e il Prodigjôs, i agnui e i diaui si incuintravin su cheste tiere. E la musiche e judave a cjantâju e a incjantâju. Il biel libri curât di Dree Del Favero, “Lungje po’! Strumenti e suonatori tra Mito e Musica”, vignût fûr pe cjase editore di Folkest intal 2019, al dimostre une vore cemût che dute cheste tradizion e je lade a vivificâ la culture popolâr ancje intai secui plui tarts, tant che il Sîscent, il Sietcent e il Votcent.
◆ Se e je vere che il sunôr des Vilotis, ancje chês plui tradizionâls e cognossudis, al plate sot de sô melodie alc dal discjant liturgjic aquileiês, alore si rive ben a capî cemût che la musiche e cor di miârs di agns dentri des venis dal Homo furlanus. Simpri pronte a sgorgolâ, come che e fos une poce di aghe di risultive. ❚
Fin de prime part.