TERITORIS – AUSTRIE. Il sisteme de sanitât in Austrie

Vint fruts piçui o ai vût la possibilitât plui che une volte di cognossi il sisteme de sanitât in Austrie di prime man. Almancul a pet di chei paîs ator pe Europe i austriacs a podin jessi vonde contents dal lôr sisteme atuâl. Il pont negatîf daûr lis opinions critichis al è, salacor mancul che in Gjermanie, che si sta svilupant un sisteme di dôs classis: di chei cuntune assicurazion privade e di chei cu la assicurazion publiche. Problematics ancje i coscj masse alts: cussì si à di paiâ par diviers trataments. Par esempli une pulizie dai dencj e coste uns 100 euros, la tasse su la recipe atualmentri cinc euros, no si paie invezit ancjemò il ticket.
Daûr la opinion uficiâl: otim_ Il sisteme sanitari austriac al è daûr la opinion uficiâl otim: al dispon di une rêt di miedis di base e miedis specialiscj cuntune rêt di ospedâi une vore eficiente.
Il sisteme nazionâl si fonde sul principi di obligatorietât de assicurazion publiche che e cuvierç il 99 par cent de popolazion. I beneficis principâi a proviodin: assicurazion sanitarie, infortunistiche, pensionistiche e disocupazion. Ducj i servizis sociâi e la assistence sanitarie a son finanziâts cun fonts publics.
Dal 2005 si dopre la E-card: un certificât eletronic_ In sostituzion dai tradizionâi certificâts su cjarte dal 2005 si dopre la cussì-clamade E-card, che al è un certificât eletronic. Te prime fase la cjarte eletroniche e sostituìs i sfueis de mutue che daspò dut al vûl dî cirche 42 milions di tocs di cjarte ogni an. Il datôr di lavôr al paie i contribûts de assicurazion sanitarie in maniere direte tal font sanitari  (Gebietskrankenkasse); tal câs di lavoradôrs autonims a son lôr a paiâ volontariementri  par mieç de regjistrazion dongje la “Sozialversicherung der gewerblichen Wirtschaft”.
Dôs sortis di assicurazion sanitarie
• La assicurazion obligatorie e garantìs il necessari tratament medic, no cun fin di vuadagn
• La assicurazion complementâr o privade e proferìs servizis in plui tant che la cjamare ugnule tai ospedâi
Ancje se in vie uficiâl il stes nivel e la stesse cualitât a vegnin garantîts, i critics a disin che par chel che al rivuarde i miedis specialiscj o vin za un sisteme di dôs velocitâts, ven a stâi se ti covente un miedi specialist tu âs di calcolâ une spiete vonde lungje: cu la assicurazion publiche uns 3-4 mês, cuntune assicurazion privade cualchi dì – cussì a voltis no reste altri che paiâ par vê in curt une diagnosi di un vêr specialist. Si spiete pai intervents plui complicâts, tant che lis endoprotesis o i trataments dentaris e chei oculistics.  Par lis protesis la atese si misure in mês, par un intervent ai voi in setemanis. I timps si scurtin cu la assicurazion sanitarie complementâr, mintri che in câs di urgjencis sanitariis no si spiete nuie.
Trop si spindial?_ La Austrie e spint il 10,2 par cent dal prodot interni lort pe sanitât. In cifris: in dut pôc mancul di 26 miliarts di euros par 8 milions e 300 mil abitants. La assicurazion sanitarie e je il 7,8 par cent dal stipendi totâl. Metât de cifre e je paiade dal lavoradôr, chê altre metât dal datôr di lavôr. Chest al cuvierç il 50 parcent de spese sanitarie, il rest al ven dal stât, des regjons e dai comuns.
In Austrie lis cassis sanitariis a son organizadis su base regjonâl. I ospedâi publics a son puartâts indevant tant che aziendis privadis. In medie o vin sîs jets ogni mil abitants.
JANEZ ERAT