“Surtùm”: il gnûf progjet discografic dal cjantautôr Massimo Silverio

Al vûl dî “palût”, “paludere”, e tal furlan di Çurçuvint si dîs “surtum”. Al è il titul dal gnûf album dal cjantautôr Massimo Silverio, artist cjargnel, musicist e autôr che al dopre la lenghe mari intune maniere dal dut particolâr. Al cjante in cjargnel, chel vecjo cjargnel imparât dai nonos e che cumò si stente simpri di plui a sintîlu, e che par scrivilu lui al dopre segns di grafie che no son chei uficiâi de lenghe furlane. Par esempli, za dal test dal prin toc che al vierç l’album, che al à titul “Sorgjâl”, al scrîf: «Pa fraide prejere / il lavri si šglonfe cul šcûr / pa hrudja tô vouš». Une naine di sunôrs une vore sugjestîfs, che al met ancje in forme visive, cuntune maniere di rindi efiets di bocje su segns di scriture dismenteade, che si cjate in cualchi liriche di autôrs locâi de Cjargne. Une operazion interessante, parcè che e met in evidence une variante, tra lis tantis che e à la lenghe furlane; variantis che però a risultin simpri plui trascuradis tal mont des nestris letaris. Coragjôs Massimo Silverio, come che al jere stât tal album di esordi dal titul “Hrudja”, une altre peraule dismenteade, che e sta par “gruse”, ven a stâi la croste di une feride daûr a vuarî. Speciâl no dome tal ûs de lenghe mari, Silverio, ma ancje inte musiche, presentantsi come un esempli cence precedents tal mont de musiche par furlan. Il so mont musicâl nol è un folk revival, no si imbarcje in emulazions di musichis de Europe orientâl, come che al capite di sintî par altris artiscj nostrans, nuie a ce fâ cu lis “songs” americanis, o il pop comerciâl, o la cjançon di autôr taliane, o il rap. Lui al cjape ispirazion de musiche minimaliste, dal post punk, de eletroniche, e inte onde dai siei fraseçs, al rievoche ancje atmosferis gotichis di nainis che, par cui che al scrîf, a cjapin cualchi sproc dal cjant aquileiês, in particolâr tal movi lis silabis des peraulis su melisims luncs, ae maniere di un trop o di une secuence. Ma dut al è rivistût di sonoritâts eletronichis, indulà che no mancjin ghitaris, violins, parfin il cuar des Alps, percussions, tra efiets naturâi e elaborazions sintetichis.
◆ Al è un viaç umit dentri de memorie, come che al scrîf.
«O pensi ae umiditât come a une emanazion frescje di vite, come chê che si sint tal vint, dopo une ploie pesante. O pensi ae umiditât come a un lûc sacri che al sta disparint. E mi domandi: e sta par scomparî ancje la nestre capacitât di lassâsi vistî de memorie? Alore mi rive dome cheste imagjin: chê di un cjant, une preiere che e puedi poiâsi su lis robis come zulugne, come rosade».
◆ Lant a esplorâ chest “Surtùm” si cjatin pocis diferentis, e al è ancjemò lui, Massimo Silverio, a spiegâ il fîl che al lee i titui di cheste gnove antologjie musicâl e poetiche.
◆ «Ve, forsit parcè che e je tante umiditât in chest disc, partint di ”Avenâl” che al è essence, la anime di une spiete e di un amôr che al cor tal cuarp come un arbul, fint al “Grim” che e je une preiere ae aghe, par fâle tornâ a jessi il grim di ducj nô. Ducj, nissun escludût. E al è tant torgul, tant ingôs. Tiere, muscli, une flame che e bruse tra i vapôrs, come i jespui di dut chest che o vuei comunicâ. La ingordisie dal “Prim” fenomen, un cjant che si ten compagnie di bessôl, cjantant. Un cjant che al passe par “Zoja”, la ghirlande funebre, un cjant par cui che nol è plui, “Vare”, e un cjant pes personis che e stan patint, “Ghirbe”. Un cjant par chest mont amputât, “Sorgjâl”. Sparide la peraule al è restât un libri mut. Consumât il libri, ce restial? Finît il cjant vîf, che nol è mai stât scrit, ce restial? Une ricercje, une prove di contat cun chest lûc dulà che il nestri lassit al podarès depositâsi, trasformâsi, tornâ a nassi. Si prove, ancje cirint di lassâ lâ il control. Ma augurant di lassâ dome un pôc di ben».
◆ Il disc, realizât pe etichete Okum, al è produsût di Manuel Volpe, scrit di Massimo Silverio e rangjât insiemi a Nicolas Remondino e Volpe. Cun lôr Mirko Cisilino al cuar e ae tube, Flavia Massimo al violoncel, Benedetta Fabbri al violin e Martin Majers al cuar des Alps.
◆ Lait a scoltâ alc in rêt e daspò comprait il disc, e scoltaitlu ancje dal vîf, intai concierts che al fasarà e che al sta za fasint. Parcè che al merete, e je une robe gnove che il Friûl inmò no à vût, se no in graciis ae creativitât sensibile di Silverio, atent ai sunôrs, ai patrimonis che al è bon di supâ e restituî no dome ae platee dai furlans, ma ancje di fûr de regjon e dal Stât talian. Intune maniere une vore atuâl. ❚