SPECIÂL – «Pimp my Ride» ae furlane in Europe

Giosuè Rossi, di Darte, si è indotorât in Jurisprundence a Udin. Al davuelç la pratiche di avocat e cun di plui al colabore e al scrîf par diviersis rivistis di motôrs organizant ancje conferencis e manifestazions pe sigurece stradâl (viôt ancje il so articul a pagjine 10 di chest numar, ndr). Tal 2008 al à inviade une denuncie ae Comission europeane par risolvi i problemis dal marcjât des personalizazions sui veicui.
Ce isal il tuning e parcè in Italie aial tancj problemis?
Personalizâ un veicul al significhe modificânt cualchi part, come che e dîs la peraule stesse, par rindilu unic, personâl.
Cemût ise la situazion ta chei altris paîs de Union europeane?
Baste passâ il confin cu la Austrie o lâ a Lignan e cjalâ lis machinis targadis todescjis par rindisi cont di cemût che chest marcjât al sedi liberalizât in Europe. In Italie un veicul (machine o moto) nol pues jessi modificât e chest al fâs un dam al Friûl, parcè che lis nestris aziendis no puedin impuartâ chescj prodots de Austrie.
Ma elaborâ un mieç di traspuart (moto o machine) no comprometial la sigurece?
I veicui a son realizâts cuntun set-up di compromès tra confort, sicurece e presit. Istalâ rovedis o frens plui grancj che a incressi la tignude di strade, o rovedis plui piçulis vie pal Invier, nol pues che miorâ la sigurece dal veicul.
In ce consistial il ricors?
Il ricors a la Comission europeane al è un imprest che i citadins a àn par comunicâ a lis Istituzions europeanis che il propri stât nol rispiete il dirit comunitari. Ta chest câs la Italie e viole il principi di libare circolazion des marcjanziis parcè che un prodot austriac (par esempli un implant frenant) nol pues jessi istalât suntun veicul talian.
A ce pont isal il ricors: la Europe aie dât cualchi rispuete?
Al è un an che o colabori cul responsabil legâl de Comission. La Europe e à interogât za 2 voltis il Ministeri dai Traspuarts e cumò o sin daûr a cjapâ sù lis provis par puartâ il câs devant de Cort di Justizie.
Christian Romanini