SLOVENIE. A Lubiane gnûf guvier di centri-drete

JANKOVIĆ_ Puedial il partît che al à vinçût lis ultimis elezions parlamentârs cu la maiorance relative stâ fûr dal guvier dal paîs? Al è ce che al è sucedût in Slovenie dopo lis votazions anticipadis dai 4 di Dicembar dal an passât. Di fat, dopo passe doi mês di tratativis pe formazion dal gnûf esecutîf, la Lista Zoran Janković-Pozitivna Slovenija (Liste Zoran Janković-Slovenie Positive), nassude dome sîs setemanis prime des elezions par man dal sindic di Lubiane, si cjate a jessi ae oposizion.
ELEZIONS_ Dopo la colade dal guvier di centri-çampe di Borut Pahor, sfiduciât ae fin di Setembar dal 2011, i slovens, clamâts pe seste volte de indipendence dal paîs in ca a votâ par rinovâ la Cjamare di Stât (Državni zbor), a àn volût dâi fiducie a Janković, imprenditôr di sucès, serp di nassite, vignût a stâ a Lubiane cu la famee tal 1964. Su un totâl di un milion cent mil vôts (la afluence e je stade dal 65 par cent), 310 mil di lôr a son stâts pe Liste di Janković, vâl a dî il 28,5 par cent, cun 28 sentis. A son stadis dal dut faladis duncje lis previsions fatis tes setemanis prime dai istitûts di pueste, che a davin sigûr vincidôr l’SDS, il Partît Democratic di Janez Janša, che invezit al à scugnût contentâsi dal 26,2 par cent cun 26 sentis. Al tierç puest l’SD, i Sociâldemocratics dal za president dal Consei Pahor, cul 10,5 par cent e 10 sentis. Stant che la leç eletorâl, fondade sul sisteme proporzionâl, e previôt che par jentrâ te Cjamare di Stât si scuen cjapâ almancul il 4 par cent, a son rivâts adore a jentrâ tal Parlament altris cuatri partîts: Lista Gregorja Viranta (Liste di Gregor Virant, president de Cjamare) cul 8,4 par cent e 8 sentis, DeSUS (Partît democratic dai Pensionâts) cul 7 par cent e 6 sentis, SLS (Popolârs) cul 6,9 par cent e 6 sentis, in ultin Nova Slovenija (Gnove Slovenie, partît conservadôr) cul 4,8 e 4 sentis. A son restâts fûr i Demoliberâi dal LDS e Zares, za partîts di guvier cun Pahor; dopo 18 agns nol è jentrât te Cjamare il Partît Nazionâl SSN, formazion di drete estreme.
TRATATIVIS_ Viodût l’esit des elezions, il President de Republiche Danilo Türk al à fidât il mandât par meti dongje il gnûf guvier al vincidôr Janković. Dut câs, si è capît daurman che nol sarès stât facil: Janković al à inviât tratativis cui Sociâldemocratics, cul partît di Virant, president de Cjamare, e cul DeSUS. Ai 11 di Zenâr stâts, il vôt in aule par capî se al podeve nassi un guvier di centri-çampe al è stât une vore clâr: sui 90 parlamentârs, dome 42 a son stâts a favôr, un cuintri, ducj chei altris (listis di centri-drete) no àn votât. Un faliment che al à puartât il President Türk, une setemane dopo, a clamâ Marko Voljc, za diretôr gjenerâl de Nova Ljubljanska Banka: un tentatîf blocât daurman dai partîts plui grancj, cun Janković che si è dit pront a fâ un pas indaûr.
GUVIER_ E cussì al è stât: in vie uficiâl, Türk nol à clamât il secont classificât, Janša, par meti in pîts il gnûf esecutîf, ma istès la Cjamare di Stât lu à votât cuant che ai 28 di Zenâr si è presentât in Parlament fuart di un acuardi za cjapât cun Lista Virant, DeSUS, SLS e Nova Slovenija. I parlamentârs che a poin l’esecutîf a son 52, e chest al varès di sigurâ al gnûf guvier di centri-drete une maiorance vonde stabil. Dal decim guvier de Slovenie indipendente, jentrât in cjarie ai 10 di Fevrâr cun 50 “sì” sui 82 votants te Cjamare, a fasin part cuatri ministris dal SDS e doi par ognidun di chei altris cuatri partîts di guvier; la uniche femine e je Ljudmila Novak, ministri cence puartesfueis pai Slovens tal mont, di Nova Slovenija.
MINORANCIS_ A poiâ il guvier Janša ancje i doi deputâts de minorance taliane, Roberto Battelli, e ongjarese, Laszlo Göncz, ducj i doi confermâts di gnûf. Par cont di Battelli, candidât unic pal puest al Parlament, a àn votât 1151 membris de minorance sui 2712 che ’ndi vevin dirit. Dopo la lôr elezion, Battelli e Göncz a àn firmât un acuardi cun Janša par sostignî lis comunitâts taliane e ongjarese: l’obietîf ultin al è chel di rivâ a une “leç cuadri” che e meti adun dutis lis normis che a àn di sigurâur une valide tutele. ■
ALESSIO POTOCCO