Siums furlans che a vegnin di Milan: il progjet musicâl dal grup etno progressive Reverie

Co la sera a si pièrt ta li fontanis, il me país al è colòur smarít. Jo i soi lontàn, recuardi li so ranis, la luna, il trist tintinulà dai gris. E tache cussì la poesie il Cjant da li campanis di Pier Paolo Pasolini. Cumò sierait i voi e imagjinait di scoltâ lis sôs peraulis in musiche. O pûr Stradis dismenteadis di Eddy Bortolussi o Instants di Angelo M. Pittana, che a sunin tant che cjants. E po inmò, i tescj di Nadia Pauluzzo, Nelso Tracanelli e tancj altris: i poetis furlans a son metûts in musiche intun gnûf progjet che si clame “Gnots furlanis, il Timp dal Sium” dal grup “etno progressive” Rêverie (www.reverieweb.com). Lôr a son Valerio Vado, che al è l’ideadôr e al sune ghitaris e tastieris, la cjantante e percussioniste Fanny Fortunati e il polistrumentist Alberto Sozzi. Ce che al è il “timp dal sium” nus al spieghe Vado: «Lu clamin cussì i aborigjens australians» al dîs «al è un particolâr rapuart jenfri l’om e il timp, la dimension mentâl incussiente li che l’om al è bon di recuperâ lis sôs lidrîs. E cjatâ lis lidrîs lu jude a capî indulà lâ. Cussì mi soi domandât: dulà isal il gno “timp dal sium” se no in Friûl?». I Rêverie a son a stâ a Milan, e a àn puartade la lôr musiche vie pe Italie e tal forest, ma Valerio al è origjinari di Visignan, frazion di Siest, in provincie di Pordenon. «Cuant che o ai capît che lis poesiis par furlan che o vevi metût in musiche a contavin propit la ricercje dal “timp dal sium”, mi si è impiade une lûs tal cjâf: la sonoritât des peraulis mi à fat vignî iniment un grum di robis e di emozions che no crodevi di cognossi o che o pensavi di vê dismenteât. O vevi cjatât lis me lidrîs, il gno timp dal sium al jere stât evocât de marilenghe. E un cercli si sierave». Il disc al è in progjet di jessi pront dentri de Istât (finanziât in part ancje in gracie al crowdunding, ven a stâi il finanziament coletîf tal web). Intant che o spietìn di sintiju sunâ ancje in Friûl, us domandìn: e voaltris ce si insumiaiso? Lu fasêso par furlan? E dulà us puartino i vuestris siums? ❚
N.G.