SIMPRI BOGNS. Alan Brusini, “Mans vuèidis”, Pasian di Prât, 1988

Il vieli vescul, / ros come un garoful, / al benedìs il tei / uê ch’al è Jugn / plen di cîl e soreli. / Tra zàgos, fun d’incens / e plumis lizeris di frutins / sot lis cjampanis / deventadis matis. / Parentri il vert dai teis / il vieli vescul, / ros come un garoful, / al è plen di cîl / e bonodôr d’incens.
Corpus Domini e je la prime poesie di cheste racuelte, publicade la prime volte intal 1957 par cure di Risultive. Intal 1988 e je stade tornade a editâ di Campanotto, cu la zonte des vot (no siet sicu che al risultarès de tabele a p. 111) lirichis de sezion Stagjon curte, che a jerin vignudis fûr intal 1962 li de Filologjiche.
La prime sezion, Mans vueidis, e je la plui penze, cun cincuante lirichis. Si respire subit un bonodôr di Friûl leint chestis pagjinis. Une tiere là che il cori dai mês e des stagjons al lave indevant dutune cu lis fiestis religjosis (Vinars sant, Pasche, lis Rogazions) e profanis (Sevrut, la sgjarnete dal prin di Mai) e dut al jere vêr, san, vîf: la polente, il lat inte gamele, la plume dal pôl. E ancje i lavôrs a vevin une lôr poesie che, cumò, o vin dismenteade.
Nostalgjie? Sì, nostalgjie, ma no sterpe. Che Brusini al è ben cussient di trop dure che e jere la vite par chei che a scugnivin fâ sant Martin (e il pinsîr al va ae poesie di Galliano Zof) o ben emigrâ (e al ven iniment, naturalmentri, Leo Zanier), o pûr lâ in vuere (e o pensìn a Celso Macôr). No si à duncje la sensazion di un passât di vaî, ma pluitost di riscuvierzilu midiant de poesie e dal poete che al à savût cjatâle dentri tes piçulis robis di in chê volte, in chês imagjins, in chei moments.
La sezion Il timp al cope rosis  si organize in tredis cuadruts che a àn ducj par argoment fruts e frutis: che a zuin, che a vain, che a simiotin i grancj. No je rivade sere / che lôr a’ son za’ omps. Velu ancje chi il sens dal timp che al cor vie.
In dut, lis poesiis a son sessanteune. Vot di chestis: A’ van pal mont, Nome il gust di séi pari, Tajât il soreâl, Uri 54, Cjampanis di quaresime, La mari di gnot, La mari foreste, Il cjalzumit  a son ‘lis plui bielis poesiis par furlan di chescj ultins agns’ (vâl a dî chei daspò de seconde vuere). Il judizi al è nuie mancul che chel di Pieri Pauli Pasolini, inte prefazion che e fâs plui preseôs  il libri (parie cu la postfazion di Andreina Ciceri). Prefazion che no à la ande di circostance, ma che e je un sincîr at critic. Si lu capìs ancje des cinc letaris dal poete di Cjasarse (une a Ciceri e cuatri a Brusini stes) che a completin chest volum. ❚
✒ Laurin Zuan Nardin