Si strenç il numar des licencis sul Wörthersee

Par che la situazion ecologjiche dal Wörthersee e vadi in miôr, il Land Carinzie al vûl ridusi lis barcjis a motôr e no molâ fûr plui gnovis licencis: cussì il numar totâl al larès in mancul e, in reson di chel, in graciis dal moviment ondôs ridot, si ridusarès ancje il stress pe flore e pe faune. Sul lâc a son 388 puescj pes barcjis cun motôrs a combustion. In dì di vuê 3569 di lôr (3388 privâts e 181 aziendis) a son suntune liste di spiete, metude sù intal 2016 par morestâ il cumierç des licencis. E cun di fat in chel stes an a son stadis dadis fûr nome 17 licencis, ancje par vie che i cjapitanis, zaromai anzians, si son dismenteâts di tornâ a fâlis. Daûr de categorie de barcje, la rinovazion e je obligatorie ogni cinc-dîs agns, ma nissune des autoritâts e vise che si sta svicinant la scjadince. La date e je scrite nome sul document di licence. Stant a ce che a disin i esperts, il cumierç des licencis al continuarà a florizâ, se intai agns che a vignaran lis listis di spiete a saran pardabon sieradis, tant che al è confermât di cetancj messaçs publicitaris di compravendite di barcjis a motôr che si lein lenti sù. Ve ca un esempli: “Barcje a motôr cun licence comprendude pal Wörthersee. Cundizion: gnove. Funzionament: motôr dentri carene cun arbul di trasmission. Lungjece: 6 metris. An di costruzion: 2021. Presit di vendite: 560.000 euros.”
◆ Stant al vendidôr, un impresari dal Wörthersee, l’interessât al comprarès une “aziende” esistente. “Jo o vent la barcje, no la licence; chê e je za cjapade dentri, tant che il numar al è dutun cu la barcje”, al contint il stes. La barcje no valarès 560 mil euros, ma nome 350 o 400 mil. La vie normâl e je che di ereditâ la licence, ma si pues fâ ancje in altri mût: si met sù une Srl e si nomene un diretôr comerciâl. La barcje, dutun cu la licence, e aparten a la dite, po si pues ben nomenâ un altri diretôr, che in vie pratiche al devente il gnûf titulâr de licence. Simpri in chel, sul lâc a vegnin vendudis licencis tor i 30.000 euros. Plui di trê mil personis a spietin la volte intai uficis di competence dal Land par brincâ une licence digjitâl. Lis listis no son publichis, ma ogni interessât al podarès domandâ il so puest in mût trasparent, al informe l’ufici competent.
◆ Ce disial il Land su la cuistion dal cumierç des licencis? La vendite di licencis no sarès pussibile. Se une societât e je parone de autorizazion, cussì e reste, ma il Land nol pues intervignî su la struture des proprietâts civîls des stessis societâts. Ven a stâi che, si ben che la vendite direte di privât a privât no sedi pussibile, a esistin dut câs trucs che a permetin di meti un repeç e sghindâ il probleme des venditis. ❚