Salvìn la nestre scuele… prin che deventi come la nestre sanitât

A l somearès che a rivedin buinis gnovis pe nestre scuele. Di une bande, la Regjon e pant la intenzion di puartâ il teme de istruzion su la taule de Comission Paritetiche cul Stât: di chê altre, i dâts de Invalsi a puartin une altre volte i risultâts dal nestri sisteme scolastic al prin puest in Italie. E alore, parcè fevelâ di scuele se lis robis a van ben? La rispueste e je che nol va dut cussì ben cemût che al somee, e dut ce che al lusìs nol è simpri aur.
◆ Partìn des competencis: i nestris students a àn un nivel plui alt di ducj chei altris in Italie pe percentuâl di ecelencis, il 10,8% in Talian e il 23,4% in Matematiche. Dut câs i problemis a son doi: prin di dut chest nivel si sta sbassant, e po nol à nissune corispondence cul cuadri che al ven fûr de medie dai esams di maturitât.
◆ Ae fin dai 5 agns di studi superiôr, di fat, a son dome il 7,3% i students furlans che a rivin a passâ i Esams di Stât cul 100, cun o cence laude. In Calabrie, invezit, al è il 17,8% il numar dai diplomâts che a vegnin fûr des scuelis secondariis di secont grât cul massim dai vôts. E chest no cate che intai tests Invalsi di Talian, lis provis calabresis a viodin dome il 3,6% dai fantats rivâ ae valutazion plui alte. Une contradizion che e je avonde penze e che e je avonde dificile di spiegâ.
◆ Nol è dificil spiegâ invezit cemût mai che i risultâts furlans Invalsi, i miôr in Italie, no puedin lassâ contents. Come pal rest des regjons, a son di fat une vore piês di chei dai agns indaûr e a àn un significât brut: al vûl dî che il nestri sisteme nol è une ecezion, e al sta lant a cessecûl cui aprendiments. Parcè? Ce ur sucedial ai nestri fantats?
◆ Ducj i dan la colpe al Covid e ae scuele a distance. Chel periodi, frontât in maniere responsabile ma ancje improvisade, al à dât la ilusion che si podedi lâ indevant cence studiâ o cence aprofondî. E alore? Ce fâ? Olsâ a domandâ une scuele plui seletive al somee une blesteme, e ancje lis polemichis sui esams vignudis fûr ae fin dal an a mostrin che no sin pronts a cambiâ paradigme, ma lis fameis a son prontis a criticâ dome i ecès, e no la mancjance, di severitât.
◆ In dut chest al coventarès vê il cûr di cjapâ in man il sisteme scolastic e dreçâlu (o ribaltâlu) fin che o sin in timp. Il sbassament dai nivei di aprendiment al è un pericul e al riscje di tornâ a menânus indaûr ai timps dulà che i furlans ator pal mont a jerin i mancul istruîts e a vignivin cjolts a vore par ultins e licenziâts par prins, stant che a savevin pôc e nuie di timps, dirits e contrats e no fasevin siopar nancje sot torture.
◆ Isal chest il model che o volìn pai furlans dal avignî? Libars di scugnî lâ o di restâ a servî sot paron? Par mudâ il sisteme, modernizâlu e fâ cuintri aes sfidis di un futûr complès, a partî de inteligjence artificiâl, al sarès ben che il Friûl al cjapàs la iniziative di gjestî in autonomie il so sisteme scolastic. E une sperance e je nassude cuant che a son stadis pandudis lis materiis che la Regjon e à domandât di negoziâ in Paritetiche cul guvier di Rome. In cheste liste e je ancje la scuele.
◆ Dut a puest alore? Nancje par idee. Parcè che Fedriga al domandarà al guvier dome la gjestion dal Ufici Scolastic Regjonâl, che al è dome un fruçon di chel che al coventarès, ven a stâi la competence primarie su la scuele. Cence il reclutament dal personâl, la pussibilitât di incidi sui programs di insegnament e cence un sisteme di valutazion, la nestre scuele e larà planc planc a patràs, inte stesse maniere che la sanitât furlane – une volte esempli ecelent – e je cumò deventade un probleme cence soluzion. Salvìnle, prin che al sedi masse tart! ❚