Rivoluzion tai distributôrs

Tes ultimis setemanis a son rivadis gnovis impuartantis sul teme dai presits dai carburants sedi in Slovenie che in Cravuazie.
◆ Tachìn dal Paîs nestri vicin. Il guvier dal prin ministri Robert Golob ae metât di Jugn di bot e sclop al à mudât la normative che e stabilìs ogni dôs setemanis (ae miezegnot tra lunis e martars) il presit de benzine. Cheste regule però no jere valide pai distributôrs logâts dilunc dai 625 chilometris des autostradis, li che lis compagniis a podevin decidi il presit ognidune par lôr cont. Cumò nol è plui cussì: un litri di benzine 95 o 100 otans, come un di gasoli, al à il stes presit in dut il Paîs e fieste finide. Stant che cheste decision e à fat saltâ i conts des compagniis di distribuzion di carburant, che par solit a àn un presit plui alt tes pompis di benzine che si cjatin su lis autostradis, la prime a tirâ sù un grant davoi e je stade la plui antighe e la plui impuartante, vâl a dî la Petrol. La prime reazion e je stade chê di blocâ daurman ducj i invistiments za previodûts in Slovenie, cun di plui ancje lis sponsorizazions tal mont dal sport. No dome: cuatri pompis di benzine, tra chês che aromai no davin un grant vuadagn (cemût che al à dit il president de societât Sašo Berger), a son stadis sieradis ai 23 di Jugn, par po jessi tornadis a vierzi dopo lis fuartis protestis de int dal puest ai 17 di Lui. Cemût laraie a finî? Il guvier Golob di centriçampe nol mole, ma al scuen stâ in vuaite par vie des elezions parlamentârs dal 2026.
◆ Rivoluzion tal stes setôr ancje in Cravuazie, li che invezit il guvier di centridrete al à fat contentis dutis lis compagniis dai distributôrs. Cemût mai? Par vie che dopo trê agns, il presit dai carburants nol sarà plui stabilît ogni dôs setemanis dal guvier centrâl, ma ben al sarà decidût in plene libertât des compagniis. La comunicazion uficiâl e je stade dade fûr ai 14 di Lui stâts di bande dal ministri de Economie Ante Šušnjar, che al à fat savê che la decision e je rivade viodût che i presits si son stabilizâts e che duncje al è rivât il moment just par vê un marcjât libar in chest setôr. Cuntune zonte però: il guvier al tignarà di voli i presits par no dâ spazi a auments cence justificazions. ❚