Promoturismo FVG cumò si invente ancje la bandiere

✽✽ “Mostra con orgoglio la tua appartenenza al Friuli Venezia Giulia con questa bandiera di alta qualità! Realizzata in 100% poliestere, resistente e leggera, presenta una stampa in sublimazione dai colori intensi e duraturi. Il design blu con la scritta IO SONO FRIULI VENEZIA GIULIA la rende perfetta per eventi, manifestazioni o per decorare spazi interni ed esterni. Aggiungila subito al carrello e porta in alto il tuo orgoglio friulano!” Al è ancje il pont di esclamazion par dâ plui fuarce identitarie al messaç publicitari che al compagne la vendite di une bandiere che e discancele la acuile patriarcjâl cu la scrite e un biel tricolôr dongje.
✽✽ Al è dificil capî se li di Promoturismo, ideadôrs e vendidôrs di cheste “robe”, a sedin mats di cjadene o se ancje cheste furbarie e sedi part di un plan plui fin pensât par disviâ e metût adun di pueste par confondi imagjins e contignûts.
✽✽ “Giudicata perfetta per eventi, manifestazioni”: imagjinaitsi i corteus cui vessii che a svintulin e i partecipants che a berlin a vôs plene “Io sono Friuli Venezia Giulia!” cun cualchi vôs disarmoniche che e dîs “Ma con il trattino”.
✽✽ Lu vevin za scrit timp indaûr e al è daûr a capitâ in maniere puntuâl: denant de presince simpri plui grande de bandiere furlane in ocasion di events sportîfs, incuintris, ricorencis, la Regjon e pare il colp obleant la presince di chest logo e dal simbul regjonâl, la famose gjaline romane che e parone su Aquilee, dapardut.
✽✽ Par rivâ a chest, si slargjin intervignint in ogni setôr comerciâl, in ogni manifestazion publiche: des maiutis e felpis aes monturis dal Udin, des pomis e formadis ai concierts, aes pagjinadis di publicitât. Chel che si pues bolâ cuntune marche, al ven bolât: prossim obietîf a saran lis mudantis. No stait a ridi: vuê al ven za fûr sui prodots di une aziende locâl innomenade tal setôr dal vistiari. Cuant che si esagjere, dut câs, si à indaûr l’efiet contrari, cuant che si oblee, a pene de cancelazion dai contribûts regjonâi, si stice la repulsion. Intai ultins timps, di fat, a son cressûts in sens paralêl i esemplis di resistence a chel logo tant falât e ofensîf pes cualitâts e ecelencis furlanis.
✽✽ E che ae fin a Friuli Doc no sedi stade la presince di Promoturismo, nol è un mâl che nol sedi un ben. ❚